Moi boa música, a do grupo indie pop Leria, e moi bo ambiente, de confraternización. Iso foi o que se viviu, no núcleo de Elviña, na terraza do Bar O Ambigú, na estrea das Sesións Vermú co BNG. Soubo a pouco, mais non vos preocupedes: repetiremos o vindeiro domingo, 13 horas, no Bar O Invernadero (Barrio das Flores). E tamén con Leria!!!
“Os gobernos municipais do BNG son exemplo de solvencia, capacidade e bo facer. E todo ese bo facer querémolo poñer ao servizo da Coruña, para lle dar o impulso que a cidade precisa”, afirmou, durante a súa intervención no Encontro Nacional Municipal do Bloque, o candidato nacionalista á Alcaldía, Francisco Jorquera.
A Coruña vive nun certo estancamento. Non porque a sociedade coruñesa non teña vigor ou forza, senón porque durante estes catro anos non atopou un aliado no Goberno Local. O obxectivo do BNG é liderar a cidade para lle dar o impulso que necesita, argumentou Jorquera ao tomar a palabra perante un ateigado auditorio no Pazo de Congresos de Santiago de Compostela.
“Coller impulso e dar o salto, dicía un poema de Lois Pereiro. Fagámolo: collamos impulso na Coruña e deamos o salto!”, proclamou o candidato nacionalista.
