A Coruña vive nun certo estancamento. Non porque a sociedade coruñesa non teña vigor ou forza, senón porque durante estes catro anos non atopou un aliado no Goberno Local. O obxectivo do BNG é liderar a cidade para lle dar o impulso que necesita, argumentou Jorquera ao tomar a palabra perante un ateigado auditorio no Pazo de Congresos de Santiago de Compostela.

“Coller impulso e dar o salto, dicía un poema de Lois Pereiro. Fagámolo: collamos impulso na Coruña e deamos o salto”, proclamou o candidato nacionalista.

Nunha alocución con tintes literarios, Jorquera sinalou como propósito do BNG facer da Coruña “a Cidade Barco, a Cidade Faro, a Cidade Luz”.

E detallouno a seguir: “Cidade Luz porque pola súa tradición cultural, pola súa conexión coas correntes máis avanzadas de cada momento, pola súa creatividade, A Coruña ten que ser a nosa cidade das luces”.

“Cidade Barco, porque reúne todas as condicións para ser a capital ecolóxica do mar”.

“Cidade Faro, porque, como dixo Domingos Merino, o primeiro alcalde nacionalista da nosa cidade, A Coruña ten que ser un faro para Galiza. E un faro tamén na defensa e normalización do noso idioma”.

Jorquera concluíu a cualificar o BNG como a “esperanza de cambio e de futuro”, quer na Galiza quer na Coruña. “E ese futuro comeza o 28 de maio. Coa vosa forza ímolo conseguir!”, arengou.