Novas

Tal e como formalmente lle solicitaron por escrito o pasado martes BNG e a Marea Atlántica, a Concellaría de Urbanismo vai convocar a Mesa de Traballo coa veciñanza de Elviña afectada polo Parque Ofimático o próximo martes 29 de setembro ás 17 horas no Pazo de María Pita (salón dourado).

O grupo municipal do BNG recibiu con preocupación as afirmacións realizadas por Inés Rey segundo as cales é intención do Goberno Local construír “unha cidade dentro da cidade, un novo ensanche” nos terreos que fiquen liberados no porto da cidade.

No acordo de investidura asinado por BNG e PSdeG en xuño de 2019 figuraba expresamente que a negociación dos orzamentos do Concello comezaría sempre no mes de setembro, co propósito de que puidesen entrar en vigor a principios de cada ano.

O Bloque Nacionalista Galego fai súas as alegacións da Agrupación de Marisqueo a Pé da Confraría de Pescadores da Coruña e a Plataforma en Defensa da Ría perante o Plano de Dragaxe e Rexeneración da Ría do Burgo –formuladas xa tempo atrás e contidas nun escrito entregado por estas entidades o pasado venres á Delegación do Goberno- e vainas trasladar en forma de Declaración Institucional aos plenos que este xoves van ter lugar nos concellos de Oleiros, Cambre e Culleredo e a do próximo 1 de outubro no da Coruña.

É xa moita hora de que o Goberno Local honre o seu compromiso e se reúna coa veciñanza de Elviña afectada polo Parque Ofimático, nunha Mesa de Traballo que procure ou ben a desafectación ou ben unha solución urbanística equiparábel que suscite o consenso veciñal. O BNG, conxuntamente coa Marea, demanda o concelleiro de Urbanismo que teña esa reunión o día 29 ou, se esa data a ten ocupada, que fixe outra, mais sempre antes de concluír este mes.

Nos Plenos desenvolvidos en xullo e setembro o concelleiro delegado de Urbanismo, Juan Díaz Villoslada, comprometeuse a que antes de concluír este mes mantería unha reunión, unha Mesa de Traballo, coa veciñanza afectada polo Parque Ofimático na procura dunha solución definitiva a este conflito urbanístico.

A concelleira do BNG Avia Veira rexistrou un rogo, que defenderá no Pleno do próximo xoves 1 de outubro, para que o Goberno Local promova o uso do galego por parte das entidades sociais, deportivas ou culturais, coas que ten asinado convenios nominativos.

Eis un fragmento da fermosa alborada "Pinceladas de Galicia", da autoría de Benxamín Fernández Pazos, que Moncho do Orzán interpretou no Cemiteiro de Santo Amaro o sábado 19 de setembro durante o acto que honrou a memoria de Pedro Galán Calvete, o mozo do Partido Galeguista asasinado, en setembro de 1936, aos seus 19 anos, polo fascismo golpista.

Como vén sucedendo ininterrompidamente desde 2003, este sábado déronse cita no Cemiterio de Santo Amaro militantes e simpatizantes nacionalistas para renderen tributo á memoria de Pedro Galán Calvete, mozo galeguista de 19 anos asasinado polo fascismo golpista en setembro de 1936.

Pedro Galán Calvete tiña apenas 19 anos, era secretario de Organización das Mocidades Galeguistas na Coruña e o fascismo golpista arrebatoulle a vida o 16 de setembro de 1936. Crime cometido? Ser un activista a prol dos dereitos nacionais da Galiza, da mellora das condicións de vida das clases populares e da normalización da nosa lingua.