O BNG ve na dimisión do xerente do Consorcio da Música un novo capítulo dunha crise de xestión froito da desatención do Goberno Local
A dimisión do xerente do Consorcio para a Promoción da Música, Andrés Lacasa, representa o “enésimo capítulo dunha crise de xestión” que é produto do abandono desta institución -da que dependen a Orquestra Sinfónica de Galicia e a Escola Municipal de Música- por parte do Goberno Local.
Así o considera a concelleira do BNG Mercedes Queixas, responsábel de Cultura no grupo municipal nacionalista.
“Esa crise de xestión véñena denunciado sistematicamente as e os músicos da Orquestra Sinfónica de Galiza e as e os traballadores da Escola Municipal de Música, con demandas laborais moi razoábeis e con protestas sobre a deterioración dos edificios que acollen estas institucións, no caso da escola a dificultar mesmo a aprendizaxe do alumnado”, afirma Queixas.
Ante a marcha de Andrés Lacasa, o BNG reclama que “a nova xerencia se cubra de forma aberta, transparente e sen dilacións”
Tamén as persoas abonadas da Orquestra Sinfónica de Galiza teñen expresado as súas críticas, quer ante a falta de mantemento do Pazo de Ópera -con pingueiras que mesmo chegaron a inhabilitar o uso dalgunhas localidades- quer ante a “drástica redución do proxecto pedagóxico e formativo” da OSG, cuxo director alertou inclusive sobre hipotéticos recortes na programación de concertos ante a insuficiencia dos recursos económicos.
E, por suposto, esa crise de xestión ten sido denunciada reiteradamente polo BNG. “Temos insistido moitísimo en que a Xunta debe 5,8 millóns de euros ao Consorcio e temos interpelado o Goberno Local para sabermos que xestións ten feitas para a Administración galega saldar esa débeda”, remarca Queixas.
Ante a marcha de Andrés Lacasa, o BNG reclama que “a nova xerencia se cubra de forma aberta, transparente e sen dilacións”, sendo que “os problemas están e hailles que dar solución”.
“O último que quere o BNG é que a xerencia do Consorcio para a Promoción da Música se sume á longa listaxe de postos e dirección sen ninguén á fronte, como foron o Ágora, o Fórum, o Teatro Colón, o Consorcio do Turismo ou a xefatura de servizo de Deportes”, conclúe Queixas.
