Novas

A concelleira do BNG Avia Veira vaille preguntar mañá ao Goberno Local, no Pleno deste xoves 3D, por que non se ten dirixido á Compañía de Tranvías para lle esixir que reforzase as liñas de autobús nas horas punta, nomeadamente en traxectos con moita frecuencia de uso como o 1A, o 21, o Universitario, o 6 ou o 14.

Francisco Jorquera, chamando a crear xa o Consello Económico e Social. Ha ser unha ferramenta útil para a cidade ter un tecido produtivo máis diversificado e moderno, imprescindíbel para enfrontarmos as secuelas da pandemia #Pleno3D

A pandemia puxo aínda máis en evidencia os problemas fundamentais da economía coruñesa –desindustrialización, aposta por facer da Coruña unha cidade exclusivamente de servizos, perda da condición de capital financeira da Galiza, esmorecemento do porto como motor produtivo-, polo que se torna máis urxente que nunca reaccionar desde o Concello.

Que a Corporación exprese o seu desexo de que a Real Academia Galega e a Casa Museo Emilia Pardo Bazán permanezan na cidade. Ese é un dos propósitos que anima a moción que a concelleira do BNG Avia Veira vai defender no Pleno do vindeiro xoves 3 de decembro. A iniciativa persegue tamén instar a Xunta a que, unha vez restituída a titularidade pública do Pazo de Meirás, reclame a súa cesión ao Estado para o converter nun Centro para a Memoria Democrática da Galiza, sen desbotar por iso que cumpra tamén funcións de recordación da figura da autora de “Los Pazos de Ulla”.

En xuño de 2019, ao asinar o Acordo de Investidura co BNG, o PSdeG-PSOE comprometíase a aprobar, no primeiro ano de mandato, a Ordenanza do Galego, unha norma encamiñada a regular o uso do noso idioma por parte do Concello. Transcorrido ese primeiro ano de mandato, o compromiso do grupo que dá soporte ao Goberno Local continúa sen ser cumprido.

Que fixo a alcaldesa para q os orzamentos do Estado e galegos fosen mellores para A Coruña? Solicitou reunirse con Feixoo ou Sánchez? Onde está o fío directo, a capacidade de interlocución, que anunciou ao tomar posesión do seu cargo? Preguntas de Francisco Jorquera ao Goberno Local para o Pleno do vindeiro xoves 3 de decembro.

 

A falta de dilixencia administrativa do Goberno Local, ao non licitar a tempo un novo contrato após caducar o anterior, é a causa da desaparición neste exercicio académico 2020-2021 dos cursos de educación afectivo sexual que se viñan impartindo dentro do programa A Coruña Educa.

O portavoz do BNG en María Pita, Francisco Jorquera, considera que a cidade recibe un “maltrato” quer nos orzamentos do Estado quer nos galegos e, nese sentido, vaille preguntar ao Goberno Local, no pleno do vindeiro xoves 3 de decembro, que xestións fixo a alcaldesa perante Madrid e a Xunta para que as demandas da cidade fosen atendidas.

Os orzamentos da Xunta para 2021 reservan pouco máis de 47 millóns de euros de investimento directo na cidade da Coruña. Pois ben, esa cantidade representa apenas o 1,8% do total do investimento territorializado no conxunto da Galiza, unha suma que ascende a 2.502 millóns de euros.

O grupo municipal do BNG quer manifestar a súa protesta pola decisión do Goberno Local de desviar á Comisión de Facenda a información sobre os datos de execución orzamentaria da Concellaría de Innovación, Industria, Emprego e Consumo, até o momento en que foi cesada a súa anterior titular, Eva Martínez Acón.