Novas

A deputada do BNG Mercedes Queixas rexistrou un feixe de iniciativas –proposición non de lei, pregunta oral e pregunta por escrito- por medio das cales insta a Xunta a que aumente o cadro de persoal do Centro de Saúde de Novo Mesoiro visando dar unha cobertura sanitaria de calidade a todas as persoas da área de influencia deste barrio coruñés.

A concelleira do BNG Avia Veira rexistrou un rogo oral para a súa lectura no Pleno do vindeiro mes de xuño co propósito de que a alcaldesa inicie o procedemento que leve a que lle sexa outorgado o título de fillo predilecto da cidade ao doutor cirurxián Diego González Rivas.

Preguntámoslle a Inés Rey polas sucesivas crises do seu goberno e respondeunos non ela, senón José Manuel Lage e fíxoo de forma evasiva: Francisco Jorquera inquiria polos episodios críticos vividos en María Pita e Lage quixo desviar a atención con datos das últimas licitacións.

O BNG non se resigna a dar por perdida Alu Ibérica –a súa desaparición agravaría aínda máis o preocupante proceso de desindustrialización que sofre a nosa cidade e comarca- e por iso a deputada nacionalista no Parlamento galego Mercedes Queixas presenta na cámara unha proposición non de lei visando que a Xunta promova un plan industrial para a factoría coruñesa que garanta a continuidade da súa actividade e, consecuentemente, o mantemento dos seus 300 postos de traballo.

A permanente inestabilidade do Goberno Local no que vai de mandato –con cesamentos como o da concelleira de Emprego, a renuncia do concelleiro de Urbanismo, a retirada de competencias do de Cultura e a renuncia do seu director de área, a marcha do coordenador xeral do Concello e a recente sentenza que anula o nomeamento da concelleira de Deportes- foi o argumento dunha das tres preguntas orais do BNG ao Executivo coruñés no Pleno deste 5M.

Nin PSOE nin PP apoiaron a moción coa que o BNG pretendía, vía modificación do PXOM de 2013, que se prohibise a construción de vivendas nas Durmideiras, na contorna da Torre de Hércules.

En 2021 houbo na cidade 133 beneficiarias do bono taxi para persoas con mobilidade reducida. En 2022 o número aumentou até as 244 persoas. Mais o diñeiro destinado polo Concello non incrementou na mesma proporción. Mantívose idéntica partida, 155.000 euros. Por tanto, a axuda per cápita descendeu moi significativamente: pasou de 1.165 euros a 635, un descenso do 45%.

Primeiro a alcaldesa anunciou a apertura para abril de 2021, logo o voceiro do Goberno local para o primeiro semestre de 2022...e aquí estamos, co Complexo Deportivo do Castrillón fechado e sen dotación orzamentaria abonda. O asunto vaino volver levar a Pleno Francisco Jorquera.

Por cuarta vez no que vai de mandato o BNG vai formular nun Pleno a cuestión de cando se vai inaugurar o Complexo Deportivo do Castrillón. E non o vai facer por gusto, esclarece Francisco Jorquera, senón polos sucesivos incumprimentos por parte do Goberno Local dos seus propios prazos.