“De aquí ao 29 queremos dar a coñecer estas xornadas entre a mocidade coruñesa”, explicou Iago Mosquera, responsábel comarcal da organización. Así́, Galiza Nova organizará catro actividades diferentes entre as 10:30h e as 19.00h, “todas actividades diversas, abertas a todas as mozas e mozos da Coruña que queiran participar e pensadas para abrir espazos de reflexión e debate arredor dalgúns dos temas que máis preocupan a mocidade hoxe en día” dixo Mosquera.

A primeira actividade comezará ás 11:00h e consistirá nunha conversa da man de Daniela Fernández, activista polos dereitos LGBT, sobre a historia recente da disidencia sexual en Galicia: “Non só se trata de aprender sobre o noso pasado, a idea é entender a loita queer na actualidade para crear un presente e futuro libre de discriminacións”, sinalou Iago Mosquera. Tras unha breve pausa café, a seguinte actividade será ás 13:00h e consistirá nunha charla arredor da saúde do galego na cidade da Coruña. Tal e como explicou o responsábel comarcal, “con esta actividade queremos dar a coñecer outra versión da nosa cidade, menos coñecida, mais que demostra que aquí tamén se fala a lingua de Rosalía e existe unha longa tradición de loita polos nosos dereitos lingüísticos. A actividade será coordinada por Carlos Callón, escritor e activista e autor do Libro negro da lingua galega, que nos falará de feitos e persoas da nosa cidade que contribuíron a facer avanzar a loita pola defensa do galego até onde estamos hoxe”.

Abrirán as conversas Daniela Fernández, Carlos Callón, Iago Suárez e David Soto

Pola tarde continúan as actividades. Será ás 16:30h cando teña a lugar a terceira e consistirá nun debate aberto arredor das estratexias militantes na contexto actual que coordinará o deputado no Parlamento Galego Iago Suárez. “Trátase de poñer sobre a mesa, debater e analizar a eficiencia das distintas maneiras de participar na vida política hoxe en día, así como reivindicar a importancia da organización e a mobilización social para producir mudanzas”, explicou Iago Mosquera. Por último terá́ lugar un coloquio arredor do que significa o neoliberalismo e as súas consecuencias, así como as maneiras de confrontar as desigualdades que o actual sistema económico xera. Esta última actividade virá da man de David Soto, concelleiro do BNG na Coruña.

O xantar será conxunto nalgún dos locais do barrio dos Castros: “Alén das actividades formativas, tamén é un día para facer convivio e coñecer compañeiras doutros lugares”, salienta Iago Mosquera. As xornadas non teñen ningún custo e tanto para asistir a elas como para o xantar é preciso inscribirse no formulario anunciado nas redes sociais de Galiza Nova: https://forms.gle/cLuVydgKQNWsuiuh7