Que se dean definitivamente por superados os convenios de 2004, que o Estado condone a débeda contraída por mor da construción de Punta Langosteira e que se garanta de forma inequívoca o mantemento da titularidade pública dos terreos do porto interior que se vexan desafectados de usos portuarios.

Esas son as principais achegas que o BNG trasladou por escrito para seren incorporadas ao documento inicial de Bases Estratéxicas para o desenvolvemento do Proxecto Coruña Marítima.

As propostas do BNG foron presentadas esta mañá en conferencia de prensa por Francisco Jorquera, portavoz nacionalista no Concello.

As achegas do BNG teñen como propósito resolver as ambigüidades e contradicións en que, a xuízo do Bloque, incorre o documento inicial das bases estratéxicas do Proxecto Coruña.

“As contradicións”, esclareceu Jorquera no seu encontro cos medios, “atinxen a aspectos chaves como a titularidade dos terreos obxecto da intervención e o financiamento da súa transformación”.

A contradición é evidente cando por unha banda (páxina 11 do documento de bases estratéxicas) se fala do “interese común en manter a titularidade pública dos espazos” e, por outra (páxina 26), se consigna a necesidade de “analizar e atender os copromisos e acordos dos convenios subscritos en vigor para a financiación da construción do porto exterior, xunto co financiamento da débeda da Autoridade Portuaria, mediante a obtención dos aproveitamentos urbanísticos necesarios”.

A xuízo do BNG, a mellor garantía de que os “espazos” manteñan a titularidade pública pasa por “dar por definitivamente por superados” os convenios de 2004, pois son estes os que contemplan “a obtención dos aproveitamentos urbanísticos necesarios” (isto é, a venda de activos, de terreos, a súa privatización) para facer fronte á débeda da Autoridade Portuaria.

E dar por superados os convenios de 2024 non é só unha proposta do BNG, é tamén vontade do Pleno do Concello, como se reflicte en numerosos acordos unánimes adoptados ao respecto, remarcou Jorquera.

Para o BNG, a solución á débeda non debe pasar pola venda de terreos portuarios, senón pola súa condonación.

“Volvemos lembrar que o Goberno central condonou a débeda do Consorcio València 2007 por un importe moi superior á débeda do porto da Coruña”, dixo o portavoz nacionalista.

A mellor garantía de que os “espazos” manteñan a titularidade pública pasa por “dar por definitivamente por superados” os convenios de 2004, pois son estes os que contemplan “a obtención dos aproveitamentos urbanísticos necesarios” (isto é, a venda de activos, de terreos, a súa privatización)

Cunha particularidade: a débeda de València foi contraída para adecuar o porto a actividades que nada tiñan a ver coa actividade portuaria, en tanto que “no caso da Coruña foi para financiar a construción do porto de Punta Langosteira, froito dun acordo que se presentou como unha decisión de Estado para compensar Galiza das consecuencias da catástrofe do Prestige”.

Un consorcio

O BNG propón a constitución dun Consorcio coa participación das distintas administracións públicas, de modo a impulsar e xestionar o proxecto Coruña Marítima.

Sería no seo dese Consorcio onde a Administración xeral do Estado, titular dos terreos, tería que contribuír “como mínimo”, para financiar todo o proceso de conformación da nova fronte marítima, cunha cantidade equivalente á débeda do Porto da Coruña con Portos do Estado.

O Concurso

Canto ao concurso convocado para o desenvolvemento do Master Plan, o BNG expresa as súas reservas por se ter apostado por un concurso por procedemento restrinxido, “polo perigo de que se limite a posibilidade de expertos locais concursaren en igualdade de condicións”. “Cremos que é necesario aproveitar e poñer en valor o coñecemento existente na Coruña e na Galiza”, acrecentou.

As orientacións do Proxecto

As achegas do BNG ao Documento de Bases Estratéxicas poñen o acento en que o proxecto debe preservar as actividades produtivas do porto interior. “O porto ten que continuar a ser porto. Punta Langosteira non cobre todas as necesidades da Coruña en materia portuaria, pois foi concibido como un porto refuxio con poucas liñas de atraque e boa parte do solo xa está ocupado ou o seu uso xa está comprometido”.

En definitiva, o Master Plan debe partir, estima Jorquera, das conclusións do Plan Estratéxico do Porto, para satisfacer as necesidades da economía produtiva -dirixida ao desenvolvemento da chamada economía azul, con especial destaque para a investigación, o desenvolvemento e a innovación (I+D+i).

Tamén teñen que ter necesariamente cabida políticas ambiciosas para mellorar o medio ambiente -cómpre ter en conta as alteracións climáticas en curso, facendo do porto barreira de contención face a elevación do nivel do mar. A nova fronte marítima constitúe igualmente unha excelente oportunidade para corrixir a baixa ratio de vexetación por habitante existente na Coruña, creando infraestruturas verdes nos actuais espazos portuarios.

O porto ten que continuar a ser porto. Punta Langosteira non cobre todas as necesidades da Coruña en materia portuaria

Canto á mobilidade, o BNG é partidario de manter no peirao de San Diego a infraestrutura necesaria para a implantación futura de servizos ferroviarios de proximidade e dun intercambiador que conecte estes servizos con outras formas de transporte (bus urbano e metropolitano, transporte marítimo...).

Novos equipamentos e vivenda

Sobre a hipótese de instalación de novos equipamentos nos espazos portuarios desafectados, o BNG é claro partidario de lle dar prioridade a  aqueles de carácter público “que permitan corrixir os déficits existentes”.

En troca, o BNG considera que entre as prioridades non se encontra a da creación dun grande recinto multiusos, “pois A Coruña xa conta con instalacións deste tipo, necesitadas en moitos casos de actuacións de mantemento e mellora”.

Canto a usos residenciais, Jorquera enfatizou que o BNG non ve como prioridade a construción de vivenda na nova fronte marítima: “Xa existen novos desenvolvementos urbanos previstos e o que cómpre é completar o tecido urbano consolidado, apostando por un modelo de cidade compacta”.

En todo caso, se finalmente houber vivenda, o BNG defende que se asegure o mantemento da titularidade pública dos terreos (vivenda pública), se combinen os usos residencias con outros usos, se evite o efecto illa -coa creación de ámbitos desconectados do resto da cidade-e se impida tamén densidades excesivas ou a aparición dun gueto para persoas de alto poder adquisitivo.

Achegas xa formuladas na Comisión do Concello

Jorquera remarcou que boa parte das achegas do BNG “recollen suxestións e propostas” formuladas polas persoas e entidades que compareceron na Comisión Especial da Fachada Marítima do Concello que el mesmo preside. “Agardamos que sexan tidas en conta”, dixo.

O BNG non ve como prioridade a construción de vivenda na nova fronte marítima: “Xa existen novos desenvolvementos urbanos previstos e o que cómpre é completar o tecido urbano consolidado, apostando por un modelo de cidade compacta”.

En todo caso, avanzou que o BNG “vai iniciar un traballo de divulgación das nosas propostas”, pois a participación social é moi importante cando se trata de perfilar o deseño da nova fronte marítima da cidade.

En todo caso, e xa para concluír, Jorquera subliñou que a posición final do BNG, no debate destas bases estratéxicas, vai depender de como se resolvan “as contradicións” que a formación nacionalista observa nelas, “en aspectos que consideramos chave como a titularidade dos terreos obxecto da intervención e o financiamento da súa transformación”.