CONFERENCIA DE PRENSA DE JORQUERA

"O liderado en defensa da cidade pasa por algo máis que por ser anfitrións de cimeiras"

Conferencia de prensa de Jorquera
“O liderado en defensa da cidade ten que traducirse en cousas moito máis importantes que en exercer de anfitrións”, dixo esta mañá en conferencia de prensa o noso voceiro en María Pita, Francisco Jorquera, en relación ás dúas cimeiras que irán ter lugar esta semana na nosa cidade: a reunión Inés Rey-Alfonso Rueda deste martes e o encontro Pedro Sánchez-Olaf Scholz programado para mércores e xoves.
"O liderado en defensa da cidade pasa por algo máis que por ser anfitrións de cimeiras"

Para o candidato do BNG á Alcaldía da Coruña, é bon que exista un “diálogo normalizado” entre as distintas administracións. “Mais o diálogo”, esclareceu, “é unha ferramenta. O importante é que dea froitos”.

É por iso que, en relación á cimeira con Rueda, Jorquera pídelle a Inés Rey “que reclame un maior esforzo investidor da Xunta na nosa cidade”, sendo que o investimento por habitante da administración galega na Coruña é até inferior á metade do que nos correspondería por poboación.

Canto á cimeira hispano-alemá, Jorquera considéraa unha “ocasión de ouro” para lle reclamar aos dous gobernos “unha posición firme contra o novo regulamento aprobado pola Comisión Europea” que expulsa a nosa frota de 87 caladoiros comunitarios. “Estamos ante o que pode ser un golpe mortal para un sector vital da economía da Galiza. Vital tamén para a economía coruñesa”, remarcou.

É tamén unha “ocasión de ouro” para o Goberno local emprazar o seu homólogo central a que se debruce sobre cuestións chave para o futuro da Coruña. “Refírome á condonación da débeda do porto, á implantación de servizos ferroviarios, á modernización da liña ferroviaria entre A Coruña e  Ferrol e á devolución ao Concello dos terreos e instalacións titularidade do Estado en desuso ou infrautilizados”, enumerou.

O candidato á Alcaldía ve a cimeira hispano-alemá unha “ocasión de ouro” para os dous gobernos rexeitaren a proposta da Comisión Europea que expulsa a nosa frota de 87 caladoiros comunitarios

Reclamacións ao Goberno central e reclamacións ao Goberno Galego. Iso é o que pedimos desde o BNG. “Na Coruña a oferta de vivenda pública promovida pola Xunta é ridícula. E o investimento nos centros educativos, escolas infantís ou residencias e centros de día para os nosos maiores é claramente insuficiente, cando non, simplemente ausente”, dixo Jorquera, quen chamou o Goberno galego a non utilizar o novo CHUAC como cortina de fume para agachar os recortes no sistema sanitario público e o desmantelamento progresivo da nosa atención primaria.

Púxolle máis deberes Jorquera á alcaldesa na necesaria presión política á Xunta: hai que lle pedir que asuma de vez as súas competencias en materia de mobilidade, “no canto de sacar da chisteira pasarelas para desviar a atención dos problemas reais” de colapso das comunicacións por estrada que sofremos a cotío nos accesos á cidade.

“Igualmente”, subliñou, “reclamamos da Xunta e do Concello que deixen de xogar a pasarse a pelota para que dunha vez por todas sexa realidade o  Centro de Saúde de Santa Lucía”.

Está ben por tanto o diálogo ao máximo nivel coa Xunta, sempre que dea froitos, e estaría tamén óptimo que ese mesmo diálogo se practicase tamén, identicamente ao máximo nivel, entre o Goberno Local e o central. “Ese é o encontro que todos estamos agardando”, dixo. E non para utilizar A Coruña como escenario en que posar para as cámaras, senón para avanzar en cuestións que mellorarían a vida da cidade.

 

 

"O liderado en defensa da cidade pasa por algo máis que por ser anfitrións de cimeiras"