O mal estado en que se atopa o Colexio de Educación de Infantil e Primaria de Prácticas, un centro de ensino público emprazado no edificio da Normal, débese á “falta de atención por parte de dous gobernos, o galego e o local”, afirma a deputada do BNG Mercedes Queixas.

“As familias levan tempo a reclamar melloras no mantemento e na conservación deste colexio. Ningunha das administracións deron resposta ás súas demandas”, remarca a tamén concelleira, quen vén de rexistrar un feixe de iniciativas ao respecto no Parlamento galego -proposición non de lei e pregunta oral e por escrito.

Humidades, desprendemento de cascotes en zonas de paso para as crianzas, árbores sen podar, portas e mobiliario deteriorados, mesmo falta de revisión da instalación eléctrica ou das ventás dan boa conta de que os necesarios labores de mantemento non se están a levar a cabo, o que ten conducido a ANPA a se mobilizar en demanda dunhas instalacións dignas e seguras para a comunidade educativa. “Todo o noso apoio ás súas reivindicacións”, apunta Queixas.

Na súa proposición non de lei, a deputada insta o Goberno galego a avaliar o “deterioro” que presentan as instalacións do centro e a “planificar un proxecto de reforma integral, cun cronograma de actuacións, co compromiso de comezar con cargo aos orzamentos de 2025 a execución das máis urxentes, contando coa participación e consulta da comunidade educativa”.

Ao mesmo tempo, e sendo que o CEIP Prácticas se atopa na Normal como produto dun convenio entre a Universidade da Coruña (dona do inmóbel) e o Concello, Queixas propón que se impulse unha mesa de negociación para actualizar o acordo de colaboración entre as devanditas institucións, de modo a “reforzar a oferta de calidade educativa” do centro de ensino.