Francisco Jorquera

O portavoz do BNG en María Pita, Francisco Jorquera, dirixiu unha pregunta por escrito ao Goberno Local sobre o núcleo da Fontaíña, na parroquia de San Vicenzo de Elviña, claramente necesitado de actuacións que o doten de máis e mellores espazos públicos e equipamentos comunitarios.

O novo contrato da planta de residuos de Nostián, o anterior concluíu en decembro de 2019, está máis no aire que nunca despois de que a concelleira de Medio Ambiente, Esther Fontán, dixese esta tarde no Pleno, a unha pregunta de Francisco Jorquera, que o modelo de separación húmido e seco da Coruña (consistente en catro contentores na rúa) non tería cabida na nova lei de residuos e solo contaminado que se tramita nas Cortes Xerais do Estado.

O Pleno de febreiro aprobou por unanimidade as mocións do BNG sobre a situación de Alu Ibérica e sobre a necesidade de dotar a cidade e a comarca dun tren de proximidade. Porén, rexeitou, cos votos en contra do PP e a abstención do PSOE, a moción nacionalista, conxunta coa Marea e coa concelleira non adscrita Isabel Faraldo, sobre a memoria histórica en que se demandaba o apoio do Concello á Marcha Cívica, o Roteiro da Vergoña, coa que a Comisión para a Recuperación da Memoria Histórica quere denunciar a supervivencia na cidade de símbolos franquistas.

A planta de Alu Ibérica na Coruña está nunha situación límite, á beira do peche, o que resultaría na perda de 300 postos de traballo directos. “Por empregarmos un símil futbolístico, estamos nos minutos de desconto para intentar evitar o peche doutra industria na Coruña e na nosa comarca”, alerta o noso voceiro en María Pita, Francisco Jorquera, quen mañá defenderá no Pleno unha moción ao respecto.

O portavoz do BNG en María Pita, Francisco Jorquera, dirixiu unha pregunta por escrito ao Goberno Local en relación ao desenvolvemento das clases de reforzo escolar que na actualidade se imparten nos centros cívicos de titularidade municipal.

O Castelo de San Antón acolle un museo arqueolóxico e histórico de titularidade municipal, mais este centro carece desde 2017 de director/a e tampouco ten nin arqueólogo/a nin conservador/a nin documentalista.

O 3 de decembro de 2020, o Pleno do Concello encargou ao Goberno Local, ao aprobar unha moción do BNG, que establecese negociacións co Estado para conseguir a cesión do antigo cárcere ao Concello, unha vez rehabilitado. A iniciativa emprazaba tamén o Executivo coruñés a que demandase do Goberno central o correcto mantemento do centro penitenciario, un edificio de grande valor arquitectónico e simbólico –nel estiveron internados centos de presos políticos durante o franquismo- que ameaza ruína polo estado de abandono en que se atopa. A degradación da vella prisión ten un impacto brutal na contorna da Torre de Hércules, patrimonio da Humanidade e símbolo da nosa cidade.

Interpelado por Francisco Jorquera a respecto de se xa ten decidido un horizonte temporal para a licitación do novo contrato de Nostián, o Goberno Local di que “si”, mais se mostra incapaz de precisar cando o vai facer.

“Non estamos neste momento procesal, estudarase cando teñamos a información que corresponda procesalmente”, responde o Goberno Local ao portavoz do BNG en María Pita, Francisco Jorquera, quen inquirira o Executivo coruñés sobre se pensa reclamarlle á Fundación Manuel Piñeiro Pose as cantidades “cobradas e retiradas indebidamente” procedentes da Casa Escariz.

A construción dun inmóbel pertencente á urbanización Xardíns da Gaiteira –promovida por Metrovacesa, compañía controlada por Banco Santander e BBVA- está a afectar negativamente un edificio da Rúa San Diego, en concreto, o correspondente aos números 2, 4 e 6 desta vía pública.