Non só porque eliminase os orzamentos participativos no proceso de elaboración das contas do Concello para 2025, senón porque apenas convoca os consellos de participación e porque a alcaldesa vén de anunciar un proceso de reformulación do escano cidadán que como mínimo nos deixa non poucas dúbidas.

É por isto que o concelleiro do BNG David Soto leva esta cuestión, a do escano cidadán, ao Pleno de mañá xoves 10A, cunha pregunta oral co seguinte teor: “En que sentido pretende o Goberno Local reformular a figura do escano cidadán?”

“Acollemos o anuncio feito pola alcaldesa de reformulación do escano cidadán con temor a que se fose producir un novo recorte dos dereitos de participación da veciñanza”, relata Soto.

A alcaldesa avanzou que mantería contactos co resto dos grupos coa vista posta nesa reformulación.

“Mais eses contactos non se produciron e o que si se produciu, pola vía dos feitos, é que se lle pedise ás persoas que queren acceder ao escano cidadán que entregasen por anticipado o texto das intervencións. Esta práctica parécenos intolerábel”, avalía Soto.

David Soto considera “intolerábel” que se lle pida ás persoas que queren acceder a el que entreguen por adiantado o texto das súas intervencións

“A censura previa non é en absoluto compatíbel coa maneira en que o BNG entende a participación cidadá”, resalta.

En todo caso, para Soto é obvio que o Goberno Local “ten moi pouco interese en fomentar a participación cidadá”. Doutro xeito non se comprende por que convoca con tan pouca regularidade os consellos de Cultura, Deporte, Inclusión Social e Saúde e porque aínda non constituíu os de Lingua e Igualdade, órganos que se deberían conformar en virtude das ordenanzas que regulan esas materias.