Novas

O Castelo de San Antón acolle un museo arqueolóxico e histórico de titularidade municipal, mais este centro carece desde 2017 de director/a e tampouco ten nin arqueólogo/a nin conservador/a nin documentalista.

Máis de dous anos despois do fin da concesión da planta de tratamento de residuos de Nostián –concluía en decembro de 2019- continuamos sen saber cando se vai licitar o novo contrato deste servizo, denuncia o grupo municipal do BNG.

O 3 de decembro de 2020, o Pleno do Concello encargou ao Goberno Local, ao aprobar unha moción do BNG, que establecese negociacións co Estado para conseguir a cesión do antigo cárcere ao Concello, unha vez rehabilitado. A iniciativa emprazaba tamén o Executivo coruñés a que demandase do Goberno central o correcto mantemento do centro penitenciario, un edificio de grande valor arquitectónico e simbólico –nel estiveron internados centos de presos políticos durante o franquismo- que ameaza ruína polo estado de abandono en que se atopa. A degradación da vella prisión ten un impacto brutal na contorna da Torre de Hércules, patrimonio da Humanidade e símbolo da nosa cidade.

O portavoz do BNG en María Pita, Francisco Jorquera, rexistrou unha pregunta por escrito para saber canto lle vai custar ao Concello ser a sede dun encontro da selección española masculina de fútbol.

O Bloque Nacionalista Galego continúa a súa campaña para reclamar unha mellora nas conexións internas da Galiza e rexistra iniciativas no Congreso para implantar o servizo ferroviario de proximidade na Coruña e a súa contorna, incluíndo as conexións con Ferrol e Santiago. O deputado nacionalista Néstor Rego demanda modernizar as infraestruturas e reactivar os apeadoiros e tramos urbanos da vía que foron abandonados para dar cobertura aos principais núcleos de poboación.

Interpelado por Francisco Jorquera a respecto de se xa ten decidido un horizonte temporal para a licitación do novo contrato de Nostián, o Goberno Local di que “si”, mais se mostra incapaz de precisar cando o vai facer.

Unha multitude saiu este serán ás rúas da Coruña en defensa da sanidade pública en xeral e en particular da atención primaria da comarca e do servizo de urxencias do CHUAC. Unha multitude que o ten ben máis claro que o Goberno galego: sen persoal non hai sanidade. Unha multitude que responsabiliza da situación a quen ten as competencias para mellorar as cousas, o Goberno galego que preside Feixoo.

Que se reforce o cadro de persoal e se melloren as condicións laborais das traballadoras e traballadores sanitarios da atención primaria da comarca e do CHUAC. Iso é o que pide a través dunha batería de iniciativas (proposición non de lei para Pleno e Comisión, pregunta oral e pregunta por escrito) a deputada do BNG no Parlamento galego Mercedes Queixas.

“Non estamos neste momento procesal, estudarase cando teñamos a información que corresponda procesalmente”, responde o Goberno Local ao portavoz do BNG en María Pita, Francisco Jorquera, quen inquirira o Executivo coruñés sobre se pensa reclamarlle á Fundación Manuel Piñeiro Pose as cantidades “cobradas e retiradas indebidamente” procedentes da Casa Escariz.

Ás 8.40 partiu de Ferrol o tren máis rápido daqueles que fan o traxecto que vai cara A Coruña. Chegou a San Cristovo ás 9.54. Case 75 minutos para cubrir apenas 50 quilómetros de vía férrea. Nel viaxaba a nosa portavoz nacional, Ana Pontón, acompañada polo noso deputado no Congreso Néstor Rego e polo voceiro do BNG no Concello de Ferrol, Iván Rivas. Foron recibidos na estación de San Cristovo por Francisco Jorquera, Mercedes Queixas e un nutrido grupo de militantes e simpatizantes do BNG.