A medio dun vídeo pendurado nas súas redes, o BNG da Coruña abre unha canle de participación para recoller propostas e demandas sobre a mellora de BiciCoruña para as levar ao Pleno de febreiro.
Sería a través dunha moción que prepara a concelleira Avia Veira, responsábel de mobilidade no grupo municipal do BNG.
“BiciCoruña funciona, é un servizo público que fomenta a saúde e a mobilidade sustentábel, mais precisa reforzo e ampliación”, afirma Veira.
É unha evidencia que nos últimos anos ten aumentado o número de persoas usuarias, mais non o é menos que cada vez lle chegan ao grupo municipal do BNG máis queixas cidadás sobre defectos deste servizo que precisan seren emendados: falta de bicicletas en horas punta, estacións saturadas, barrios sen cobertura ou problemas de mantemento...
“Desde o BNG cremos que este servizo debe chegar a máis barrios, con máis bicicletas e cun funcionamento á altura do que merece A Coruña”, apunta Veira, quen lembra que o Bloque ten levado esta cuestión xa varias veces ao Pleno do Concello: “Mais a resposta do Goberno Local sempre é triunfalista e moi pouco autocrítica”.
Agora o BNG abre un período de escoita nas redes para achegar, nunha nova moción, propostas de mellora deste servizo público. “Pedimos que a veciñanza nos escriba que fallos ou carencias atopa en BiciCoruña. Queremos xuntar as opinións das coruñesas e coruñeses para ver se así o Goberno Local ve a realidade e reacciona”, remarca.
“Tomamos esta iniciativa porque unha mobilidade mellor se constrúe contando coa xente”, conclúe.
É escandaloso que a xestión dos procedementos sancionadores por infraccións de tráfico siga privatizada por unha licitación realizada por EMVSA
Aledámonos do impulso ao complexo deportivo do Castrillón mais volvemos criticar que as dimensións do vaso de auga da piscina non respectan as Normas NIDE nin recollen a construción dun vaso de chapuzar para as máis pequenas e os máis pequenos
