A respecto da celebración hoxe do Consello de Administración de Emvsa, criticamos o continuísmo da Marea Atlántica en EMVSA xa que ningún dos puntos da orde do día tiña nada a ver co dereito á vivenda, a saber: Bicicoruña, xestión de multas e piscina do Castrillón, como asuntos principais.

Deste xeito, en primeiro lugar, queremos amosar a nosa posición en contra da exposición da memoria xustificativa, pregos e estudos do contrato de subministración de bicicletas, puntos de préstamo con bases de carga e sistema de xestión, así como servizo de mantemento, e mais para o asunto 8, Publicación, se procede, de bolsa de emprego para a provisión de prazas de operario/a de o servizo de aluguer de bicicletas de uso público.

Queremos sinalar as nosas dúbidas sobre situación en que está o persoal de Bicicoruña que na RPT aprobada no Consello de Administración de febreiro deste mesmo ano, na que non puido participar a nosa concelleira Avia Veira por atoparse fóra da cidade, aparecían recollidos como persoal temporal. Cremos que debe aclararse a axustarse estes contratos á realidade antes de iniciarse calquera proceso de ampliación do persoal ou do servizo.

Do mesmo xeito, e a respecto do asunto 7, Análise e proposta de adxudicación, se procede, de asistencia técnica na xestión dos procedementos sancionadores por infraccións de tráfico, tamén amosámonos moi críticos con que a xestión dos procedementos sancionadores se faga a través dunha empresa privada cando, consideramos, debe ser realizada polo propio Concello da Coruña.

Cremos que debe ser o Concello da Coruña o xestor directo destes procedementos, e non a través dun medio propio, como neste caso se fai a través de Emvsa, que á súa vez licita a xestión. Isto significa que unha empresa privada ten acceso a datos persoais que entendemos que teñen que ser só de acceso único da Administración.

Asemade, incidimos, que os cambios substanciais que se introducen nos pregos desta nova contratación, a respecto da anterior licitación, responden a que durante o desenvolvemento da actual se teñen producido feitos moi graves que constitúen “cesión ilegal de traballadores”, tal e como teñen denunciado un grupo de traballadoras da empresa Vialine, actual licitadora. 

No que ten a ver co asunto 5, Exposición da memoria xustificativa, proposta e aprobación, se procede, de pregos de licitación pública de redacción do proxecto de execución e dirección das obras da parcela dotacional pública no barrio do Castrillón, malia estar de acordo con que se remate de vez a dotación desta infraestrutura no Castrillón, queremos volver reiterar a crítica canto ás especificidades das dimensións do vaso de auga da piscina xa que logo non respectan as Normas NIDE do Consello Superior de Deportes, tanto para as competicións locais e máis para o adestramento, ademais de que tampouco se recolle no proxecto a dotación dun vaso de chapuzar que posibilitaría o uso desta instalación para os máis pequenos e as máis pequenas.

Por último, no punto en que se acordou a delegación da licitación dos contratos menores na Dirección Xeral, tamén demandabamos que é preciso que se informe periodicamente ao Consello de Administración de todos os contratos menores que se vaian tramitando e licitando por parte de Emvsa.

A Coruña, 24 de outubro de 2018.