Novas

Unha marcha combativa, festiva por momentos, reivindicativa sempre, percorreu este serán as rúas máis céntricas da cidade, desde o Obelisco até concluír diante da Delegación do Goberno, para mostrar a enorme vitalidade do movemento feminista na Coruña. O BNG, coa presenza da parlamentar Mercedes Queixas e o noso voceiro en María Pita Francisco Jorquera, portou unha faixa co lema  "Adiante coa loita feminista".

Ante a notificación enviada por Demarcación de Costas ás persoas que moran no asentamento de A Pasaxe, segundo a cal terían que o abandonar nun prazo de quince días, o grupo municipal do BNG pídelle ao Goberno Local que defenda a vía do diálogo na perspectiva de evitar a hipótese dun desaloxamento forzoso.

A Xunta di que é o Estado quen ten que indemnizar as e os mariscadores da Ría do Burgo (por ser a administración  responsábel da dragaxe), en tanto que o Estado replica que é a Xunta quen o ten que facer (por ter as competencias en pesca e marisqueo), nun xogo que o noso voceiro en María Pita, Francisco Jorquera, ten definido como “unha partida de ping pong interminábel” na que se usa como reféns as persoas mariscadoras.

O portavoz do BNG en María Pita, Francisco Jorquera, rexistrou unha batería de preguntas por escrito en relación ao legado de Manuel Piñeiro Pose, o propietario da coñecida como Casa Escariz que, ao facer testamento en 1938, dispuxo que boa parte das súas rendas fosen para financiar o naquela altura existente Hospital Municipal.

O portavoz do BNG en María Pita, Francisco Jorquera, denunciou a “falta de impulso” do Goberno Local no que ten a ver coas políticas de memoria histórica. Fíxoo na súa intervención durante a reunión do Consello da Memoria Democrática, que este mércores 17N volveu á actividade dous anos despois da súa última xuntanza. A razón dunha paréntese tan longa, o nulo interese do Goberno Local na súa convocatoria.

No seu estado actual os orzamentos do Estado-2022 non son aceptábeis polo BNG, polo que formulamos un feixe de emendas. Entre elas, 30 referidas á nosa cidade e comarca. De seren aprobadas, incrementaríase o investimento do Estado na Coruña e a súa contorna por volta de 252 millóns de euros, con especial destaque para os 200 que irían á futura fachada marítima da cidade. As emendas foron apresentadas aos medios esta mañá polo noso deputado no Congreso Néstor Rego e o noso voceiro en María Pita, Francisco Jorquera.

Existe un informe, feito polo Instituto José Cornide a instancias do Consello da Memoria Democrática, que pide a retirada de honras a alcaldes e personalidades franquistas –desde Alfonso Molina e Sergio Peñamaría de Llano até Alfonso Molina.

O portavoz do BNG en María Pita, Francisco Jorquera, rexistrou unha pregunta por escrito para saber se o Goberno Local –en concreto, a concelleira de Medio Ambiente, Esther Fontán- mantivo encontros coa Xunta para establecer un marco de relación estábel entre a planta de tratamento de residuos de Nostián e Sogama

O portavoz do BNG no Concello, Francisco Jorquera, foi a persoa encargada, en nome do Bloque da Coruña, de dar a benvida ao auditorio que encheu o Coliseum, no acto de abertura da nosa XVII Asemblea Nacional, a terceira consecutiva que se realiza na nosa cidade.

No seu discurso, Jorquera contrapuxo A Coruña verdadeira, a que foi berce do nacionalismo, a aquela na que a maioría da cidade non se sente representada, a que levou PP e PSOE a vetaren unha moción do BNG para lle retirar as honras ao alcalde e represor fascista Sergio Peñamaría de Llano. "Esa non é A Coruña verdadeira", clamou Jorquera, ovacionado polo auditorio.

O pasado mes de agosto, o Goberno Local e a Marea Atlántica anunciaron en conferencia de prensa que en setembro terían xa ultimado o anteproxecto de Área Metropolitana da Coruña para a súa remisión ao Parlamento de Galiza, a cámara con competencias para a creación deste entre supramunicipal.