mobilidade

O PP quere tirar réditos electorais a golpe de chequeira anunciando grandes obras e infraestruturas desde o Goberno do Estado mais sen atender realmente os problemas de mobilidade

Reafirmámonos en que non é tal a necesidade da ampliación da avenida da Vedra 

Diante dos problemas reais de mobilidade na Coruña e na área metropolitana, para nós a solución é planificar un transporte público intermodal cun servizo de proximidade por tren e cun autobús pensado para cubrir as necesidades da xente

Entendemos que a solución para a aliviar o tránsito na Vedra non é ampliar carrís senón repartir antes o tráfico coa conexión da AP-9 co aeroporto e, polo tanto, coa Terceira Rolda

Queremos advírtelle ao Partido Popular que se equivoca se pensa que as coruñesas e os coruñeses van esquecer coa súa chequeira que o Estado pretende vender por anacos a cidade (terreos do Campo da Estrada, os terreos da Solana e do Finisterre, peiraos interiores etc), que temos serias deficiencias nos servizos ferroviarios para conectarnos coa comarca ou que precisamos investimentos que redunden no emprego como o da limpeza da ría do Burgo ou a conexión ferroviaria do Porto Exterior, para os que non se dá tanta presa o Goberno de M.Rajoy

Coincidimos xunto coa Asociación de Empresarios de Agrela en sinalar que a mobilidade é o principal problema na actualidade no Polígono

Mantivemos  esta mañá unha xuntanza coa entidade empresarial na que avaliamos as propostas presentadas polo nós aos orzamentos do Concello a respecto da habilitación dun espazo de aparcamento en Agrela e a rehabilitación integral de pavimentos e beirarrúas no conxunto do polígono, e que finalmente foron rexeitadas polo Goberno municipal

Desde o BNG entendemos que unha proposta integral en mobilidade e accesibilidade para Agrela, na que se garantan servizos de transporte público con maiores horarios, frecuencias e liñas, na que se dea solución ás necesidades de aparcamento habilitando zonas novas, e na que se  reurbanicen os espazos públicos, beneficiaría ás traballadoras e aos  traballadores do polígono e facilitaría un efecto chamada a outras empresas redundando nas potencialidades do polígono

Iniciamos unha campaña para facer fincapé en que as solucións aos problemas reais de mobilidade da Coruña e da súa área urbana pasan por priorizar o transporte público intermodal sobre o asfalto e o coche: unha mobilidade do século XXI

Co primeiro dos vídeos presentado hoxe, desmontamos a suposta necesidade da ampliación da avenida da Vedra e incidimos en que as solucións aos problemas reais de mobilidade na Coruña e na súa Area Metropolitana pasan por apostar por un transporte público intermodal fundamentalmente a través dun servizo de proximidade por tren e por autobús

Entendemos que en determinadas ocasións na avenida de Alfonso Molina pode haber retencións debidas a alcances mais a realidade diaria é a que amosamos no vídeo que hoxe presentamos: pódese percorrer a avenida de xeito fluído, sen retencións ou paradas, respectando os límites de velocidade e cun transito de vehículos normalizado en 5 minutos, algo que desmonta a teoría do seu colapso permanente e que so responde a intereses especulativos de Audasa defendidos polo Partido Popular e o Ministerio de Fomento

A denuncia social e as exixencias da oposición as que obrigaron ao Goberno municipal a mover ficha e evitar o “abuso” do cobro dun 10% en cada recarga da app de pagamento da ORA

É significativo que o Goberno da Marea Atlántica en inicio manifestase publicamente que todo fose debido aos pregos dando por perdida a batalla e sen estudar a fondo a proposta técnica da concesionaria da ORA

Ana Pontón traslada o seu apoio ás asociacións veciñais da Coruña que reclaman un plan de mobilidade para os barrios

Pídelle á Xunta “que cambie o chip” porque o Goberno de Feixóo leva nove anos perdidos en materia de transporte metropolitano

Solicitamos que se convoque a Comisión de Mobilidade para que o Partido Popular, como partido que estaba no Goberno no momento en que se redactaron os pregos de xestión do servizo de ordenación e regulación do aparcamento, dea explicacións sobre se a recarga anunciada na app de pagamento da ORA estaba recollida nos ditos pregos

Demandamos asemade a presenza do interventor municipal na dita comisión para que informe sobre a legalidade do cobro dun 10% a maiores en cada recarga na app de pagamento da ORA

Queremos tamén saber cales son os plans do Goberno Municipal para evitar este abuso

Ao Goberno municipal fixéronlle falla apenas 48 h e nin unha soa chamada para resolver as alegacións presentadas por nós

Chámanos poderosísimamente a atención a rapidez coa que o Goberno resolveu as reclamacións, en tan só 24 desde que rematara o prazo para facelo, cando a lei dá un mes de prazo: vese que tiñan moitas ganas de sumar e de chegar a algún tipo de acordo para incluír as nosas propostas. Aínda ben que a concelleira de Facenda nos sinalou en Pleno que a oposición tamén está para facer propostas

Sen chamada nin conversas de por medio entendemos que a Marea Atlántica desiste de poñer e marcha o carril bus, facer a consulta pública sobre os terreos portuarios, modificar a ordenanza da Renda Social Municipal para chegar a máis xente, ou elaborar un Plan de Inclusión Social

A Marea Atlántica terá que explicar publicamente por que renuncian ao seu propio programa electoral desestimando as alegacións propostas por nós e por que desbota novos investimentos nos barrios

Trasladamos ao Pleno o debate aberto na cidade sobre o transporte público colectivo

Pediremos aclaracións ao Executivo sobre a situación na que está o proceso de licitación do transporte público tras as numerosas queixas de entidades, colectivos e veciñanza nas ultimas semanas

Tamén pediremos ao Goberno da Marea que poña data para a Consulta Popular sobre os terreos portuarios e para a descentralización dos servizos sociais nos barrios da cidade

Vaise cumprir un ano desde que o BNG e a Marea Atlántica, a petición da Cadeco, presentaramos conxuntamente a moción na que se instaba, no prazo máis breve posíbel, a realizar a Consulta Popular sobre os terreos portuarios, e que foi aprobada en Pleno: non sabemos porque se ten adiado esta consulta, ao tempo que non entendemos porque se convocan foros de debate que non teñen nada que ver coa posibilidade de que a veciñanza opine sobre este tema. E a respecto dos servizos sociais, tampouco é a primeira vez que levamos a debate en Pleno o asunto: no mandato do Partido Popular realizouse un desmantelamento dos servizos sociais nos barrios que no que vai de mandato da Marea Atlántica non se reverteu, polo que entendemos que ten que ser acometida esta actuación de vez

Presentamos emendas aos orzamentos por valor de máis de seis millóns de euros para mellorar o orzamento priorizando os servizos públicos, o emprego, a mobilidade, a xustiza social e os barrios sobre as externalizacións e as festas

Esiximos que se cumpra coa moción aprobada en Pleno para a convocatoria dunha consulta publica sobre o futuro dos terreos do Porto e para iso recollemos unha partida orzamentaria

Sinalamos xa que o orzamento de 2018 era o orzamento das renuncias deste Goberno municipal. Para corrixir isto, diminuímos a partida en externalizacións, publicidade, dietas do Goberno e festas e introducimos, entre outras moitas, unha partida para o carril bus, subimos de 1 a 1,6 millóns de euros a partida da Renda Social Municipal, unha partida para o Plan de Inclusión Social

Malia que cremos que as nosas propostas son cuestións básicas que deben ser recollidas no orzamento tamén cremos que a solución a moitas tachas do Executivo da Marea Atlántica correspóndense ao que ten que ser a acción do Goberno, impulsar a modificación do regulamento de Participación, facer efectivas as ofertas públicas de emprego, exixirlle á empresa de limpeza viaria que cumpra etc