solana

Consideramos intolerábel o mercadeo partidista acaecido esta semana a conta dos terreos portuarios

Durante este mandato a reivindicación decidida para a devolución de balde dos peiraos interiores e para outro modelo de financiación para o Porto Exterior foi encabezada polas organizacións sociais en torno a Comisión Aberta e pola acción institucional, no Concello da Coruña e no Parlamento de Galiza, feita polo propio BNG

Demóstrase que hai determinadas formacións políticas que actúan en función de intereses partidarios e non por iniciativa propia ou porque o fagan en defensa dos intereses da veciñanza da Coruña e Galiza: desde drásticos e antagónicos cambios de opinión a formacións que non teñen empregado a súa capacidade de influír malia a súa representación no Congreso. Cremos lamentábel o espectáculo que se está dando e que desvía o obxectivo: a supresión do convenio de 2004, a devolución de balde dos terreos portuarios, unha vez desafectados, para usos sociais e produtivos en beneficio da cidade, e a construción do Porto Exterior a conta do Orzamento Xeral do Estado

Congratulámonos ironicamente do “cambio de opinión” a respecto do Porto do Partido Popular en tan só tres meses desde o último debate no Parlamento de Galiza, da “renuncia” da Marea Atlántica a pagar por parte dos terreos, como pretendían facer coa Solana e da “indignación” do PSOE ante o agravio comparativo co porto de Valencia similar a amosada cando a sinatura do convenio de abril entre De La Serna, Llorca, Feijoo e Losada

Reclamaremos no próximo Pleno que se realice de xeito inmediato a Consulta Popular

Rexistramos a moción presentada pola Comisión Aberta en Defensa do Común a todos os grupos municipais na que se exixe instar o Goberno do Estado a suspensión definitiva da poxa dos terreos do Campo da Estrada e do Hotel Finisterre

O novo escenario político no Estado debe significar, en coherencia coas mocións e acordos adoptados desde comezo de mandato no Concello da Coruña, un cambio nas políticas de Portos do Estado, do Ministerio de Defensa e do Ministerio de Fomento. As poxas deben ser suspendidas definitivamente e deberase promover que os terreos sexan devoltos gratuitamente á veciñanza da Coruña

Lembramos ao Executivo da Marea que a modificación do Plan a respecto dos terreos  do Hotel Finisterre e a Consulta Popular dependen exclusivamente da súa vontade

Presentamos esta mañá en rolda de prensa a nosa alegación á modificación puntual da Solana

Solicitamos a devolución do documento para unha nova redacción alegando a exclusión dos terreos do Hotel Finisterre que si estaban incluídos na moción aprobada en Pleno

Non entendemos por que o Goberno da Marea Atlántica non incluíu o Hotel Finisterre na modificación: no mandato do Partido Popular ambos solos pasaron de dotacional público a dotacional privado. Entendemos que todo é un conxunto único, espoliado no seu día e onde se atopaba a praia do Parrote, co que se pretende facer negocio especulativo, polo que é necesario que o documento que se aprobe finalmente protexa todo, garanta o seu uso inequívoco de carácter público e impida calquera negocio que a Autoridade Portuaria ou calquera outra Administración quixera facer

Demandamos que se faga público o acordo sobre os terreos portuarios asinado onte

De momento, o que sabemos do protocolo apunta a que o acordo só se referiu á titularidade dos terreos e á renuncia da Autoridade Portuaria a sacar a poxa o soar da Solana e os peiraos de Batería e Calvo Sotelo

O acordo ao que se chegou onte non altera o modelo de financiamento do Porto Exterior en base á venda dos peiraos interiores xa que os terreos de San Diego e o soar do Hotel Finisterre igualmente sairían a poxa e a Xunta de Galiza mercaría os peiraos de Batería e Calvo Sotelo

Desde o coñecemento do acordo a partir das informacións xornalísticas, o modelo urbanístico dos convenios de 2004 permanece intacto xa que co protocolo asinado onte non se modifican os usos hoteleiro e comercial para Batería e Calvo Sotelo nin os usos residenciais para San Diego

O PP amosa na sinatura do protocolo sobre os terreos portuarios un sectarismo sen precedentes, estar absolutamente ausente das necesidades e vontade das coruñesas e dos coruñeses e revela que o que máis lle importa é o reparto do “pastel” e non os usos que eses terreos vaian ter

Con este acordo e con este modus operandi, o Ministerio de Fomento, Portos do Estado, a Autoridade Portuaria e a Xunta de Galiza desprezan as coruñesas e os coruñeses e renuncian a un proxecto integrador dos terreos que se desafectarán

Insistimos na potencialidade do conxunto dos terreos portuarios para implementar usos produtivos de I+D+i relacionados co mar e a pesca, para a dotación de equipamentos e de usos sociais, e para o potenciación das infraestruturas en mobilidade que hoxe existen aí

O Goberno municipal fallou ao adiar a convocatoria da consulta popular aprobada en Pleno e ao non deseñar un proxecto para os peiraos interiores que tiña que ter feito nada máis comezar o mandato, sobre todo dado que a Marea Atlántica levaba no seu programa a reformulación dos convenios de 2004

Avanzamos o noso apoio á moción presentada polo Comisión Aberta en Defensa do Común que lle foi achegada a todos os grupos esta semana

A semana pasada valoraramos coma un “oprobio” para A Coruña e para Galiza a actitude do presidente de Portos do Estado, e de “cómplice” a actitude de Feijóo a respecto dos peiraos, e advirtiamos da necesidade de que o Goberno municipal actúe con contundencia e procedese a facer ouvir a voz das coruñesas e dos coruñeses convocando a consulta popular sobre o futuro do terreos portuarios canto antes

Levamos advertindo desde xa hai mais de cinco anos da situación dos peiraos interiores, do pretendido espolio da Coruña é da folla de ruta trazada pola Autoridade Portuaria e Portos do Estado. Cómpre actuar de vez e non perder a oportunidade histórica que nos dá unha maioría absoluta de forzas para protexer os intereses do pobo da Coruña. Por iso animamos a que os grupos municipais da Marea Atlántica e do PSOE apoien tamén esta moción e formen parte desta fronte común, comezando por blindar os terreos da Solana e do Hotel Finisterre

A actitude do presidente de Portos do Estado é un oprobio para A Coruña e para Galiza e  Feijóo é cómplice diso

Llorca veu confirmar unha nova discriminación para Galiza, acatada por Feijóo obedientemente, pola que o noso país queda discriminado fronte a outras zonas do Estado: confirmou que o Porto Exterior da Coruña de ningunha das maneiras vai ser financiado cos fondos do Estado –tal e como aconteceu en Xixón- que os terreos do porto cando estean desafectados non van ser cedidos ao Concello–como aconteceu en Barcelona ou Valencia- e que tampouco se lles vai dar ningún uso produtivo -como aconteceu en Bilbao-

Dado o pretendido silenciamento da Coruña, desde o Grupo Municipal do BNG pedimos que o Goberno do Sr. Ferreiro faga ouvir a voz das coruñesas e dos coruñeses e realice a consulta popular sobre o futuro do terreos portuarios

Entendemos, tras o anuncio de que Portos do Estado e Xunta pactaron non vender a Solana e os peiraos interiores, que novamente se quere realizar unha “fuxida cara adiante” sobre o problema de fondo, non outro, que a financiación o Porto Exterior a costa de seguir hipotecando o futuro do centro da Coruña

Consideramos, asemade, que calquera “estudo concreto” que se faga a respecto dos peiraos de San Diego non pode pasar polo uso residencial senón por ser o lugar onde se artelle un verdadeiro transporte metropolitano por vía ferroviaria e marítima e aproveitar as súas vías e toda a infraestrutura hoxe en día existente

Independentemente dos termos do acordo, realizado as agochadas, e da deslealdade do Sr. Feijóo para coas coruñesas e coruñeses que estaban pendentes dunha consulta publica sobre os usos dos peiraos, os terreos seguen pendentes de desafectación. Ademais, que houbera esta negociación e finalmente acordo sen que o Goberno municipal tivese coñecemento é algo bastante indicativo e que debería facer reflexionar a Xiao Varela e Xulio Ferreiro sobre a estratexia que seguiron. Por desgraza, e como consecuencia para o futuro da nosa cidade, mantense o suspense sobre os usos futuros dos máis de 64.000 metros cadrados no centro da Coruña e segue sen garantirse os espazos públicos para usos sociais e industriais

Demandamos, de novo, que se modifique o PXOM, que contempla actualmente nas súas fichas urbanísticas a construción de mamotretos de até 10 alturas, e que se garanta para o futuro os usos sociais, ou para a cidadanía, incluíndo na modificación da ordenación dos espazos portuarios o preservar a actividade económica actual do porto como lugar de actividade comercial xeradora de riqueza

Cremos fundamental realizar a Consulta Popular independentemente do encargado á Asesoría Xurídica do Concello e apostamos porque a pregunta que se faga á veciñanza sexa concreta e que se formule claramente a devolución gratuíta de terreos

Advertimos que o informe encargado por alcaldía para trazar “unha folla de ruta” para levar a cabo a consulta non debe converterse nun proceso que enguedelle ou adíe sine die o referendo popular

A Autoridade Portuaria ten amosado en múltiples ocasións que nin respecta nin agarda polo Concello da Coruña, que ten os seus propios intereses e que non participa do interese xeral para co pobo da Coruña. Insistimos en que non cabe negociar nada e que se debe esixir a devolución de balde. Así o dixemos na Asemblea Cidadá, non coma o Goberno municipal que calou e ocultou a súa intención de negociar, nun exercicio de hipocrisía do que deberá dar conta a todas as entidades que participamos naquela asemblea. É por iso que agardamos que o informe que encargou o alcalde non sexa outra estratexia de enguedellar e adiar as tomas de decisións aos que nos ten acostumado