Despois do anuncio no que Portos do Estado e Xunta pactaron non vender a Solana e os peiraos interiores, ademais de adiantar que se realizará un “estudo concreto” sobre o peirao de San Diego, entendemos que novamente se quere realizar unha “fuxida cara adiante” sobre o problema de fondo, non outro, que a financiación o Porto Exterior a costa de seguir hipotecando o futuro do centro da Coruña.

Deste xeito, entendemos que o anuncio realizado polo Sr. Feijóo, que entendemos que actuou con deslealdade para coas coruñesas e coruñeses que estaban pendentes dunha consulta publica sobre os usos dos peiraos, non garante que finalmente non se vaian a construír edificios nos espazos portuarios, mais ao contrario, deixa a porta aberta para que tanto a Autoridade Portuaria e Portos do Estado poida realizar manobras especulativas a conta destes terreos públicos.

Independentemente dos termos do acordo sobre os usos dos peiraos, realizado as agochadas, os terreos seguen pendentes de desafectación. Ademais, que houbera esta negociación e finalmente acordo sen que o Goberno municipal tivese coñecemento é algo bastante indicativo e que debería facer reflexionar a Xiao Varela e Xulio Ferreiro sobre a estratexia que seguiron. Por desgraza, e como consecuencia para o futuro da nosa cidade, mantense o suspense sobre os usos futuros dos máis de 64.000 metros cadrados no centro da Coruña e segue sen garantirse os espazos públicos para usos sociais e industriais.

Asemade, calquera “estudo concreto”, tal  e como anunciaba o propio Presidente da Xunta, que se faga a respecto dos peiraos de San Diego non pode pasar polo uso residencial senón por ser o lugar onde se artelle un verdadeiro transporte metropolitano por vía ferroviaria e marítima aproveitando as súas vías e toda a infraestrutura hoxe en día existente, xa que logo na actualidade a posíbel construción de vivendas en San Diego é algo que responde a un modelo de cidade antagónico ao que nós defendemos sobre todo, tendo en conta que estamos nunha cidade con máis de 20.000 vivendas baleiras.

Con todo, lembramos que se pode realizar unha modificación do actual PXOM, e que só depende da vontade do actual Goberno municipal o impedir a desfeita que Portos do Estado pretende realizar a conta de terreos que son da cidade.

Neste sentido, demandamos de novo que se modifique o PXOM, que contempla actualmente nas súas fichas urbanísticas a construción de mamotretos de até 10 alturas, e que se garanta para o futuro os usos sociais, ou para a cidadanía, incluíndo na modificación da ordenación dos espazos portuarios o preservar a actividade económica actual do porto como lugar de actividade comercial xeradora de riqueza.

A noticia a respecto da nosa fachada marítima evidencia como desde o principio de mandato houbo a falta dunha proposta de futuro do Goberno da Marea a respecto dos peiraos interiores así como houbo unha incerteza continuada na xestión de como se debía actuar, algo que levamos padecendo desde hai máis de dous anos. Advertimos, desde o mesmo comezo do mandato, que estes peiraos non poden ser vendidos mentres non sexan desafectados, polo que instamos numerosas veces o Executivo local a abordar de vez a reforma do PXOM e preservar os seus usos futuros. E agora máis que en ningún momento de todo este tempo se amosa acertada a nosa formulación, polo que se seguimos insistindo en que deben blindar canto antes eses terreos contra da especulación que pretende facer a Autoridade Portuaria, e á que se sumou e apoia a Xunta de Galiza de forma intencionada e desleal.

A Coruña, 10 de outubro de 2017.

Artigos relacionados:

• Por que construír vivendas en San Diego cando temos toda unha infraestrutura xa montada?
• O Goberno municipal é cómplice do espolio da cidade
• O engano e mentira do Goberno da Marea en menos de 24 horas: permite a venda da Solana e Finisterre
• Débese cambiar o PXOM para preservar os peiraos interiores
• Veira: "O Goberno ocultou información ou está improvisando a respecto da Solana-Finisterre"
• Estase realizando un "cambio de cromos" a conta da venda da Solana-Finisterre?
• Veira: "Se é o Concello compra os peiraos interiores estará financiando por atrás o Porto Exterior"
• O Parque Ofimático, os peiraos interiores e os terreos do Finisterre-Solana a Pleno o día 11
• Avia Veira: "É vergoñenta e inadmisíbel a posta á venda do Hotel Finisterre e a Solana"
• Solana-O Parrote: outro cambiazo do PEPRI imposto a última hora polo PP
• Os terreos dos peiraos de Batería e Calvo Sotelo non poden ser vendidos mentres non os desafecten
• O BNG pídelle ao Goberno local e á Autoridade Portuaria que non enganen o pobo no caso da Solana
• Solana e hotel Finisterre: o BNG advirte dunha grande operación de venda destes terreos