Municipais2023

Como conquistou o Dépor o planeta fútbol? Pois cunha receita patentada polo lendario Arsenio Iglesias: con orde e con talento. A esa expresión apelou esta mañá Francisco Jorquera, candidato do BNG á Alcaldía, para resumir os trazos que caracterizan a lista do BNG para as eleccións municipais.

Jorquera é “alguén que sempre está aí, accesíbel e aberto a toda a veciñanza, alguén que sabes que non che vai fallar”, dixo Ana Pontón, a portavoz nacional do BNG, durante o acto de presentación da candidatura nacionalista á Alcaldía da Coruña. “É o alcalde que precisa A Coruña para situar esta cidade á vangarda de Galiza e recuperar o pulso perdido”, engadiu.

Francisco Jorquera vai ser o candidato do BNG á Alcaldía da Coruña en 2023. Así o decidiu a Asemblea Local da formación nacionalista o pasado mércores, nunha sesión plenaria realizada no salón de actos da Fundación Luís Seoane. Jorquera obtivo o apoio unánime das e dos militantes do Bloque que participaron na asemblea.