Casas de Franco

Alén do chamado proxecto de reurbanización do espazo público da Área de Rehabilitación e Rexeneración Urbana do Ventorrillo-Casas de Franco -contestado pola veciñanza e cun recente mandato do Pleno para o Goberno Local o consensuar coas persoas afectadas- fican pendentes as obras de rehabilitación dos edificios e vivendas comprendidas nesa zona.

O BNG é firme partidario de obras que contribúan á rexeneración dos barrios -de feito, propuxo a inclusión dun plan que fose nesa dirección nos orzamentos do Concello para 2024- mais ao tempo considera esencial que esas actuacións sexan previamente consultadas á veciñanza afectada.

O portavoz do BNG en María Pita, Francisco Jorquera, rexistrou unha moción, para o seu debate no Pleno do vindeiro xoves 4N, por medio da cal pídelle ao Goberno coruñés que impulse a rehabilitación integral do grupo de vivendas popularmente coñecido como “Casas de Franco”, un asentamento de 578 moradas sociais que ocupan 2,12 hectáreas entre a Ronda de Outeiro e a rúa Mosteiro de Caaveiro, no Ventorrillo.