A Coruña, 18 de novembro de 2013.- Até tres iniciativas levou o Grupo Municipal do BNG a Pleno co fin de que o Goberno do Sr. Negreira se sumase ao coñecido como “espírito de Riotorto” e contribuíse a que a Xunta de Galiza non asuma a resolución que estabelece o copago en medicamentos para doentes graves e crónicos e co fin de que o Goberno central derrogase unha medida que o BNG cualificou de “inxustísima”. Máis unha vez, o Sr. Negreira volveu poñerse de costas ao pobo e tombou a reclamación do BNG ao modificativo de crédito e mais a moción, confirmando que o Goberno do PP no Concello da Coruña ve con bos esta inxustísima medida ideada pola ex concelleira Pilar Farjas.

O PP tomba a reclamación do BNG ao modificativo de crédito e négase a destinar o suplemento de 302.000 euros de festas á asunción do copago en medicamentos

En primeiro lugar, o Goberno do Sr. Negreira opúxose á reclamación do BNG ao segundo modificativo de crédito do ano, que votou co voto en contra das concelleiras nacionalistas. Nesta reclamación as nacionalistas propuxeron que o Concello destinase o suplemento de crédito de 302.000 euros do IMCE para festas á partida de emerxencia social, para poder asumir o copago e para facerlle, así, fronte ao novo medicamentazo do que é responsábel a Sra. Farjas, ex concelleira do PP na Coruña.

Sobre esta reclamación do BNG, o PP puxo de manifesto que as nacionalistas tratan de “obstaculizar” o labor municipal. De feito, a reclamación do BNG ao modificativo de crédito caeu tan mal no PP que mesmo o alcalde chegou a interromper a intervención da concelleira nacionalista Ermitas Valencia para pedirlle que non falase do copago en medicamentos.

O PP impide o debate da moción do BNG contra o copago en medicamentos

Tamén tombou o PP a moción presentada polo BNG en que se pedía que o Concello da Coruña emprazase a Xunta de Galiza a demandar do Estado a derrogación da resolución do 10 de setembro de 2013; que a Xunta de Galiza non aplicase esta resolución no noso país, como xa fixeron comunidades autónomas como Castilla y León, Asturias, As Canarias ou Euskadi, e que o Concello asumise o copago en medicamentos mentres a Xunta de Galiza teimase en aplicar a resolución ideada pola Sra Farjas e mentres o Goberno central non derrogase esta medida que ataca as persoas máis débiles.

O copago mata, logo non diga que non o sabía

Ademais, o BNG formulou unha pregunta oral ao respecto que foi respondida con cifras e mentiras dun Partido Popular que defendeu que as persoas doentes de leucemia, cancro, esclerose múltiple ou hepatite C, entre moitas outras enfermidades, paguen polos medicamentos. A concelleira do BNG María Xosé Bravo apuntoulle ao PP, “a pregunta non fala de cifras, nin de orzamento, só necesitamos saber de que lado están?”

“Se faláramos de cartos nós poderiamos dicirlle onde conseguilos: diriámoslle que “tacita a tacita”, dos máis de 6 millóns de euros de beneficios de EMALCSA e dos 4 millóns para as obras que debería pagar á Autoridade Portuariad e do agasallo de máis de 300.000 euros para axudarlle á Xunta de Galiza a pagar os centros de día, do modificativo de crédito que aprobaron hoxe definitivamente con máis de 300.000 para festas ou os 145.000 da Laponia coruñesa…”, espetoulle ao PP. “Iso son máis de 11 millóns de euros, pero non é nin tan sequera diso do que queriamos falar, porque para o BNG solución non pasa por que paguen os Concellos, senón porque o Goberno central derrogue a resolución e por que a Xunta de Galiza non a aplique”, engadiu.

María Xosé Bravo preguntoulle ao Goberno do Sr. Negreira, “só queremos saber se pensan que é xusto e necesario que unha enferma de cancro de mama deba pagar os seus medicamentos e que un enfermo cun tumor cerebral deba repagar as súas medicinas”. “Só queremos saber se a resolución da Sra Farjas é para o Sr. Negreira xusta e necesaria”, “só queremos saber se ben correcto que orzamento do Ministerio de Defensa sexa un 60% superior ao de Sanidade”, “só queremos saber se están co BNG, que quere acabar co copago de medicamentos para doentes graves e crónicos”, salientou.

“É difícil atopar algo máis inhumano e inxusto”, advertiu, “Sr. Alcalde este é un caso de vida ou morte, non permita que a xente enferma se sinta soa e desprotexida, porque o copago mata, non diga que non o sabía”, concluíu María Xosé Bravo quen, antes de rematar, lembrou que a Iniciativa Galega pola Gratuidade da Sanidade Pública leva semanas esperando a ser recibida polo Presidente da Xunta.

Pola súa parte, o PP nun exercicio de cinismo e mentiras e despois de botar abaixo a reclamación do BNG ao modificativo de crédito e mais a moción, sinalou que “en este Concello a nadie le van a faltar medicinas”. Porén, as cifras desmenten as falacias do PP, dado que os orzamentos aprobados inicialmente revelan que, malia o incremento do paro e do número de persoas que se atopan en risco de exclusión social, o Sr. Negreira conxelou a partida de emerxencia social en 660.000 euros. Con esta conxelación, o Concello da Coruña non podería asumir o copago.