A Coruña, 3 de xullo de 2013.- A concelleira do BNG María Xosé Bravo puxo de manifesto esta mañá, en rolda de prensa, a delicada situación que atravesan os museos científicos da cidade, unha situación corroborada polo informe de xestión do ano 2012. Bravo sinalou que o apartado correspondente aos museos científicos, asinados pola directora, recolle o descenso do número de visitantes e mais a baixa presenza doutras actividades fóra das instalacións. Así, afirma que o número de persoas que visitaron os museos durante o 2012 foi de 403.217, unha baixada do 6,36% respecto ao 2011, e tamén alude á diminución da presenza noutras actividades a través de conferencias, actividades, exposicións... e mesmo da presenza nos medios de comunicación. Este descenso reflíctese, tamén, na redución dos ingresos, tal e como se expón nestas conclusións.

Para a concelleira nacionalista estes datos plasmados en documentación oficial representan unha chamada de auxilio sobre os museos, máxime tendo en conta que son o principal eixo de divulgación científica da cidade, con moita capacidade para atraer visitantes. De feito, María Xosé Bravo apuntou que a revista de propaganda feita con cartos públicos, a LCG, que só lle dedica unha páxina a cultura, salienta a aposta polos museos científicos. Porén, esta aposta non se reflicte no labor do Goberno municipal, que provoca a perda de atracción dos museos científicos para as persoas visitantes.

Causas da perda de visitantes: o perfil inapropiado da nova Dirección e o recorte de orzamento

María Xosé Bravo, que salientou o bo facer dos técnicos do museo, que son quen garanten a actividade, advertiu de que a situación que padecen os museos científicos vén determinada por dous factores: pola escolla da directora, cun perfil inapropiado e que procede do mundo económico, e polo recorte dos orzamentos. Precisamente, cando a concelleira do BNG analizara as contas de 2013, no referente á área de Cultura, xa advertira de que os tesoirazos nas partidas de museos científicos reducirían a capacidade da Coruña para atraer visitantes.

A edila do BNG lembrou a redución que sufriu a partida de reunións, conferencias e cursiños nos museos científicos, cunha baixada espectacular, pasando dos 25.000 euros en 2011, 10.000 euros no 2012 e uns ridículos 2.000 euros nestes orzamentos. E tamén advertiu do recorte en exposicións nos museos científicos, partida que diminuíu dos 154.000 euros de 2011, aos 150.000 do 2012 até os 135.000 dos orzamentos de 2013.

Sobre o recorte de orzamento, con impacto directo sobre a redución do número de visitantes e sobre a diminución da presenza fóra das instalacións, María Xosé Bravo advertiu de que o orzamento global da área de Cultura apenas variou respecto dos anos anteriores. Porén, o Goberno municipal prefire gastar cantidades obscenas en festas e non en cultura.

Mención ao labor de anos anteriores

Chamou a atención María Xosé Bravo sobre o feito de que nas conclusións da memoria de xestión, no referido aos museos científicos, se recolla, explicitamente, un recoñecemento do labor de anos atrás.

Así, advírtese de que “o traballo realizado durante os anos anteriores permitiu que durante o 2012 se negociara a participación en varios proxectos financiados con fondos europeos que deberían plasmarse no 2013”.