"A proposta de mudanza do PXOM sobre o Parque da Agra que se traia ao Pleno de maio ten que ser distinta á actual"
A candidata do BNG á Alcaldía, Avia Veira, reaccionou na súa conta en X á retirada por parte do Goberno Local da modificación puntual do PXOM no polígono “Parque da Agra” da orde do día do Pleno de abril.
“Hoxe demostrouse que o voto do BNG é decisivo. O Goberno Local quita da orde do día un cambio do PXOM na Agra co que non estabamos de acordo nin no fondo nin na forma: pola falta de diálogo. A proposta do pleno de maio ten que ser distinta á que se pretendía aprobar hoxe”, escribiu Veira en X.
Demostrouse que o voto do BNG é decisivo, como afirma Veira, porque o Goberno Local retirou da orde do día a mudanza do PXOM ao constatar que non ía ter o apoio do Bloque á modificación puntual nos termos en que se ía levar a este Pleno.
No proceso que agora se abre, o BNG desde logo, a partir da participación da veciñanza, vai defender unha modificación puntual distinta á que o Goberno Local pretendía aprobar hoxe.
