Pois ben, o BNG vaille dar a oportunidade ao Goberno de Inés Rey de que esclareza cal é esa solución e vaino facer por medio dunha pregunta oral no Pleno do vindeiro 2 de xullo.

“A alcaldesa dixo que o fallo da Audiencia Provincial respaldaba a postura do concello. Mais quero lembrar que se iso é así é grazas ao BNG e a outras forzas da oposición. Porque se non fose polo BNG e outras forzas da oposición, o Concello xa tería pagado 2,3 millóns de euros pola devolución do antigo cárcere”, afirma o noso viceportavoz no Concello, Francisco Jorquera, autor da pregunta oral.

En efecto, no seu día o Goberno de Inés Rey chegou a un acordo co Estado para conseguir a devolución do cárcere co pagamento desa cantidade de diñeiro e sen ningunha garantía de que se entregase o edificio, actualmente en condicións ruinosas, en bo estado.

“Felizmente, o acordo foi rexeitado polo Pleno”, remarca Jorquera.

Para o viceportavoz nacionalista, conseguir a cesión do antigo cárcere “nunhas condicións xustas” é basicamente “unha cuestión de vontade política”.

“Hai que facer valer, perante a administración central, o peso político de que tanto presume a alcaldesa. E o Concello ten que utilizar as ferramentas que ten ao seu alcance para forzar esa negociación”, salienta.

Como titular até o de agora do inmóbel, o Estado, como calquera particular, ten o deber de asegurar o seu mantemento e conservación.

Perante o incumprimento desas obrigas elementais por parte do propietario, o Concello pode e debe adoptar medidas forzosas e mesmo, se se der o caso, abrir o correspondente expediente sancionador.