Pleno de 13 de outubro de 2022

Na quenda de preguntas orais do Pleno de Outubro, a concelleira do BNG Avia Veira interesouse tamén pola situación irregular en que se achan varios aparcadoiros de titularidade municipal. A ese respecto, o portavoz do Goberno Local admitiu que cómpre “pór orde nas concesións” e anunciou que antes de rematar o ano se aprobaría unha instrución para regular todas as concesións municipais, non só a dos aparcadoiros.

A xuízo de Lage, non tería sentido enfrontar a regulación por separado dos aparcadoiros municipais e aprazou esta até o momento en que se aborde a situación do conxunto das concesións municipais. “Hai que planificar e ordenar os distintos usos dos espazos municipais, que teñen distintas formas de xestión (indirecta e directa)”, defendeu.

Por súa parte, Veira denuncia que “temos sete aparcadoiros municipais en situación irregular, ou ben incumprindo as súas obrigas ou ven nun limbo legal”, polo que o BNG avoga por “unha boa política de aparcadoiros que, desde a xestión pública, se faga unica e exclusivamente en interese da cidade, con rebaixa de prezos, garantías para a accesibilidade e oferta de servizos útiles como a recollida de voluminosos ou o deseño de espazos específicos para bicicletas”.

O Instituto José Cornide de Estudos Coruñeses está “nun proceso de reestruturación para o adaptar aos tempos actuais” e para o dotar de “máis medios e recursos”, dixo o portavoz do Goberno Local, José Manuel Lage, ao ser interpelado ao respecto, no Pleno do Concello, polo voceiro do grupo municipal do BNG, Francisco Jorquera.

O Pleno pediulle este xoves ao Goberno Local que interpoña a demanda para recuperar a titularidade da Casa Cornide tal e como xa aprobou a Corporación en setembro de 2019.

Actualmente, dos 135 profesionais que prestan os seus servizos na Fundación Profesor Novoa Santos, o órgano xestor do Instituto de Investigación Biomédica da Coruña, apenas 20 teñen recoñecida a súa categoría como persoal investigador, o que supón só 13% do total.

A través dunha moción promovida pola Comisión Aberta en Defensa do Común e asinada conxuntamente coa Marea Atlántica e coa concelleira non adscrita Isabel Faraldo, o portavoz do BNG en María Pita, Francisco Jorquera, vaille demandar ao Goberno Local, no Pleno a ter lugar o vindeiro xoves, que presente antes de que conclúa 2022 a demanda para recuperar a Casa Cornide.