A candidatura do BNG para as eleccións municipais do 28 de maio, rexistrada o pasado xoves diante da Xunta Electoral, configura “o equipo que está chamado a protagonizar o cambio de rumbo que a cidade precisa”, afirma o candidato do Bloque á Alcaldía da Coruña, Francisco Jorquera. Após o rexistro da lista, os 27 candidatxs da formación nacionalista reuníronse na Coiraza do Orzán para protagonizaren unha fotografía de grupo.

A Asemblea Local do BNG, realizada no serán de onte, aprobou por unanimidade o segundo tramo da candidatura da formación nacionalista para o 28M, caracterizada por unha significativa presenza de persoas independentes, isto é, non afiliadas ao Bloque.

Un equipo para lle dar á Coruña o impulso que a cidade precisa. Para A Coruña desenvolver toda a súa potencialidade. Para a enorme forza que ten esta cidade achar no Goberno Local un aliado. Iso é o que presentou esta mañá ante os medios quen lidera ese equipo, o noso candidato á Alcaldía, Francisco Jorquera.