A Coruña, 18 de febreiro de 2013.- No día de hoxe, demostrouse o poder da mobilización do pobo e da presión política na cidade da Coruña. Por dúas veces, as persoas concentradas na rúa Padre Feijóo impediron que as forzas de seguridade e os representantes xudiciais desafiuzasen do seu piso a Aurelia Rei, xa coñecida como a Sra. Aurelia, unha anciá de 85 anos sobre a que pesa unha orde de despoxo polo atraso no pagamento dun mes do alugueiro. Ao longo de toda a xornada soaron consignas como "Aurelia queda, Aurelia non se vai", "Onde está Negreira, está cos Pereira" (os propietarios do piso en que a Sra. Aurelia vive de aluguer, "Desafiuzar é asasinar", "Non son desafiuzamentos, son asasinatos", "Non é unha crise, é o sistema", "Non temos medo, temos fame", "Esta barbarie ímola parar"... Entre as persoas que asistiron á concentración atopábanse o portavoz do BNG no Parlamento de Galiza, Francisco Jorquera, o portavoz do BNG no Concello da Coruña, Xosé Manuel Carril, as concelleiras do Grupo Municipal do BNG, María Xosé Bravo, Ermitas Valencia e Avia Veira, e ou a responsábel comarcal, Silvia Seixas.

Ao redor das 13h, o Tribunal Superior de Xustiza de Galiza (TSXG) comunicaba que o desafiuzamento da Sra. Aurelia ficaba adiado até novo aviso, un anuncio que foi celebrado polas persoas que se concentraron pacificamente contra esta inxustiza social. Porén, aproveitando a escasa presenza de activistas, media ducia de furgonetas antidisturbios despregáronse ás portas do portal número 9 de Padre Feijóo para botar a anciá do seu piso. Foi entón cando a policía mallou, por vez primeira, no portavoz do Grupo Municipal do BNG, Xosé Manuel Carril, ao colocarse diante do portal para impedir o despoxo de Sra. Aurelia, e noutros activistas.

Non foi a única ocasión en que a policía bateu en Carril. Até dúas veces máis, o concelleiro nacionalista, que acabou cun corte baixo o ollo esquerdo e con mazaduras nas costas, recibiu golpes dos axentes. "Non importan os golpes se Aurelia segue na súa casa", contestáballes Carril ás persoas que presenciaron as malleiras. "O fundamental e o que máis me importa é que Aurelia vai poder seguir vivindo no seu piso", engadía. O portavoz do BNG no Concello da Coruña, que estivo ao longo do día ás portas do número 9 de Padre Feijóo, parabenizou a todas as persoas que impediron a execución da orde de desafiuzamento e ás brigadas de bombeiros que se negaron a cortar as cadeas que lle interrompían o acceso aos axentes de policía ao piso de Sra. Aurelia.

Tamén recibiu golpes por parte da policía o portavoz do BNG no Parlamento de Galiza, Francisco Jorquera, por tratar de impedir o despexo. “É imprescindíbel que os e as cidadás tomemos a iniciativa e impidamos casos escandalosos e de inxustiza social como o que está a sufrir a Sra. Aurelia”, sinalaba esta mañá en declaracións aos medios. "Casos como o da Sra. Aurelia demostran a extraordinaria inxustiza social que representan os desafiuzamentos”, apuntaba o portavoz parlamentar, quen advertiu sentir “auténtica vergoña por que tivera que haber unha serie de suicidios para que o Partido Popular accedera no Congreso a admitir a trámite a Iniciativa Lexislativa Popular (ILP) contra os desafiuzamentos apoiada por máis de 1,4 millóns de persoas”.

O BNG leva ao Congreso a violencia policial e pide a dimisión do delegado do Goberno

Neste contexto, as deputadas do BNG no Congreso, Olaia Fernández Davila e Rosana Pérez, solicitarán a comparecencia do Ministro de Interior para que explique por que motivo se emprega a violencia policial en situación como a descrita e cando se trata de concentracións pacíficas en defensa de persoas desamparadas como o caso da Sra. Aurelia. E é que as forzas de seguridade deberían estar ao servizo da cidadanía, defendela e non protexer sempre os intereses dos máis fortes. Vemos como en moitos casos de desaloxos se empreñan a fondo para custodiar os intereses da banca e dos poderes financeiros, e son funcionarios do Estado ao servizo da cidadanía.

Ademais, o portavoz nacional do BNG, Guillerme Vázquez, pediu a demisión do Subdelegado do Goberno porque "o que hoxe sucedeu en A Coruña é dunha indignidade e dunha inhumanidade sen límites"

A dupla moral do PP levouno a tombou unha proposición de lei do BNG o día en que admitía a trámite a ILP contra os desafiuzamentos

En declaracións aos medios, Jorquera fixo alusión á proposición de lei presentada polo BNG no Parlamento de Galiza, "tombada polo Partido Popular o día en que, precisamente, se admitía a trámite a ILP contra os desafiuzamentos". O portavoz nacionalista salientou que o BNG reclamaba nesta iniciativa contemplar a dación en pago como último recurso, "xa que a dación en pago conleva que esa familia perda a súa vivenda".

Tamén recollía a proposición de lei dos nacionalistas alternativas para evitar con este drama social e asegurar o dereito de toda persoa a disfrutar dunha vivenda digna. A moratoria aos prazos de pago, a substitución da hipoteca por un contrato de aluguer con opción a recompra e que o parque de vivendas que vai xestionar o chamado banco malo pase a destinarse a uso público eran outras das propostas recollidas polo BNG nesta iniciativa, que non prosperou polos votos en contra dos deputados e deputadas do Partido Popular.

Mañá, martes, ás 9.30h, concentración nos Xulgados

O BNG tamén estará presente mañá na concentración cívica convocada para as 9.30h diante dos Xulgados (na rúa Monforte), co fin de evitar o desaloxo da Sra. Aurelia.

O futuro desta veciña da Coruña, de 85 anos, fica no aire, á espera do que decida a comisión xudicial. As e os activistas xa anunciaron que organizarán quendas para evitar que sexa expulsada do piso en que leva vivindo desde hai máis de 40 anos.