Veira vai levar este asunto ao Pleno do vindeiro xoves en forma de pregunta oral por medio da cal se interesa por saber se a estas alturas o Goberno Local xa sabe “cantos pisos da SAREB se van incorporar ao parque de vivendas municipais”.

Remarca a concelleira nacionalista que, a diferenza de forzas políticas que só se lembran da vivenda en campaña, o BNG leva todo o mandato a reclamar políticas efectivas do Concello nesta materia, con peticións referidas non só á cesión dos inmóbeis da SAREB senón tamén relativas ao soar que o Ministerio de Defensa ten en Adelaida Muro. “Xa no primeiro Pleno ordinario, en setembro de 2019, pedimos a cesión ao Concello de 3 vivendas da Tesourería Xeral da Seguridade Social”, lembra.

“Chegan agora as eleccións e parece que lle entran as ansias a quen sempre se negou pola vía dos feitos a desenvolver políticas de vivenda”, remarca Veira, para quen “o caso da SAREB é paradigmático”. “Durante anos defendemos, quer no Congreso dos Deputados quer no Parlamento galego, que as vivendas do chamado banco malo se cedesen para vivenda e sistematicamente se nos dixo que iso era imposíbel”.

Até que chegou a pre-campaña e entón o presidente do Goberno central, Pedro Sánchez, anunciou que a SAREB poría os pisos a disposición dos concellos. Moito antes dese anuncio en María Pita –en concreto, o 6 de maio de 2021- xa se aprobara en Pleno unha moción do BNG nese sentido, mais “a SAREB dedicouse durante este tempo a vacilar a un Goberno Local que lle faltou firmeza”.

Agora o que hai é unha absoluta “desinformación sobre os datos reais da presenza da SAREB na cidade”. “Algo moi parecido aconteceu co Instituto de Vivenda, Infraestrutura e Equipamento da Defensa (INVIED) ou, como nós lle adoitamos chamar, co Ministerio de Defensa S.A. Pedro Sánchez di que se van pór os bens de Defensa a dispor da vivenda pública, mais a seguir o INVIED ou Defensa S.A. di que diso nada. Era ben que se deixasen de anuncios e se comprometesen verdadeiramente cunha política de vivenda pública real”, subliña.

Canto á Xunta, administración que ostenta a maior parte das competencias en materia de vivenda, o titular do goberno galego “quixo poñerse á altura de Sánchez e dixo que el non detectara até o de agora que houbese un problema de vivenda na Galiza”.

“Desde logo para o BNG o problema de vivenda non é un problema de agora, non o descubrimos de súpeto en campaña, levamos tempo trasladándoo ao Pleno e reclamándolle á Xunta que desenvolvese as súas competencias e ao Goberno Local que fose firme diante das administracións galega e estatal e que tamén levase adiante políticas propias”, conclúe Veira.