Lembra Jorquera que Inés Rey concorreu ás eleccións de 2019 coa promesa de impulsar un plan de choque de limpeza da cidade. “Porén, tres anos despois daquelas declaracións, a sucidade existente en moitas prazas, rúas e zonas verdes da Coruña, continúa a causar numerosas queixas”, afirma o portavoz nacionalista.

Tan é así que “moitos dos rogos que rexistramos neste Pleno refírense a queixas que nos trasladou a veciñanza pola falta de limpeza”, remarca Jorquera.

O certo é que ao longo destes tres anos entraron en vigor os novos contratos do servizo de limpeza viaria, contedores e recollida de lixo, após anos caducados. Mais o problema continúa lonxe de se resolver. “Cabería preguntarse se se desaproveitou a ocasión para introducir melloras substanciais na limpeza e recollida de lixo e mesmo para mudar o modelo de xestión, abordando todo o relativo ao ciclo do lixo de xeito integral, no canto de o fraccionar en distintos contratos”, reflexiona o voceiro do BNG.

Na interpelación ao Goberno Local, Jorquera abordará, entre outras cuestións, a supervisión por parte do Concello do cumprimento por parte das empresas concesionarias das cláusulas técnicas que rexen a prestación dos servizos. E farao porque como grupo municipal temos constancia “de numerosos e sistemáticos incumprimentos”.

O voceiro nacionalista inquirirá tamén o Goberno Local sobre se pensa acometer “mudanzas necesarias” nas ordenanzas que rexen as políticas de limpeza e sobre se ten en mente levar a cabo campañas de información e sensibilización cidadá.