“Dixemos no seu momento que faríamos seguimento do cumprimento dos termos desta moción”, afirma Avia Veira, razón pola cal a concelleira nacionalista acaba de rexistrar unha pregunta por escrito para saber se o Goberno Local ten xa dado pasos quer en relación coas concesionarias quer no que ten a ver coa Xunta.

“Debemos ser firmes na defensa dunhas traballadoras que deberían ter unha valoración social e unhas condicións laborais de acordo coa importantísima función que desenvolven na nosa cidade. O mínimo, desde logo, é que as empresas cumpran o convenio colectivo e os salarios sexan revisados para as traballadoras non perderen poder adquisitivo”, afirma Avia Veira, para quen as administracións públicas deben velar para que as empresas concesionarias respecten a lexislación.

Na eventualidade de as concesionarias se negaren, como até agora, a cumprir coas súas obrigas a respecto da actualización salarial, Avia Veira quere saber cales “son as medidas concretas” que tomaría o Goberno Local para obrigar as empresas a se ateren aos pregos que rexen o servizo.

Tamén inquire Avia Veira se o Goberno Local se dirixiu xa á Xunta “para trasladar a exixencia da Corporación para mellorar os contratos do SAD aumentando o prezo do servizo”. “Se o fixo, como se comunicou?”, pregúntalle a concelleira ao executivo coruñés.