Vimos de rexistrar esta mañá unha iniciativa (podes descargala premendo aquí) na que amosamos a nosa preocupación polo estado actual dos dous edificios de estilo modernista da avenida de Oza, situados a altura dos números 150 e 152, respectivamente.

Deste xeito, preguntamos ao Goberno municipal que actuacións se están realizando desde a concellaría de Rexeneración Urbana a respecto de impedir a declaración de ruína destas dúas edificacións.

Estas dúas obras, de estilo modernista, teñen o nivel de protección estrutural segundo o PXOM actual, e malia o seu interese de carácter histórico ao ser considerados ambas “representantes da arquitectura de principios de século XX”, e o seu interese arquitectónico “fermoso exemplo da arquitectura, cheo de detalles e elementos decorativos, apreciándose a influencia do arquitecto Pedro Mariño”, de acordo ao Catálogo da Revisión do Plan Xeral de Ordenación Municipal vixente, en ambos casos o estado de conservación cualifícase como “malo”, evidenciándose un moi grave e intencionado desleixo na súa conservación.

Nas nosas preguntas sinalamos que desde o ano 2002 existe un continuado proceso de denuncia da situación que incluso ten chegado até o Valedor do Pobo e mesmo conduciu á interposición dunha sanción aos actuais propietarios do edificio do número 152 no ano 2014, polo que a situación de desleixo é continuada e advertimos que de non se actuar o dano final podería chegar a ser irreversíbel, asemade de comezar xa, dada a situación na que se atopa na actualidade o edifico, a preocupar á veciñanza da zona polo risco da posibilidade de derrubamentos e desprendementos destas edificacións.

Por último, tamén denunciamos que na actualidade, anclado á fachada lateral do edificio do número 152, colocouse un valado publicitario de grandes dimensións, e preguntamos que como este edificio ten nivel de protección II, protección estrutural,  se a colocación deste valado foi solicitada debidamente, quen autorizou esta colocación, se existe algún informe que o avale e se este valado está afectando á estrutura da edificación provocando un deterioro maior.

Entendemos que pode existir un presunto abandono intencionado polo actual propietario co obxecto de promover unha especulación urbanística. Para nós é unha mágoa que se perda de xeito intencionado, por culpa de intereses especulativos e por inacción da concellaría de Rexeneración Urbana, parte do noso patrimonio urbanístico, sobre todo porque estamos a falar de dúas edificacións modernistas de principios do século XX e que recibiron a influencia do arquitecto Pedro Mariño.

A Coruña, 10 de marzo de 2017