Presentamos esta mañá, en rolda de prensa, un informe sobre os reparos de intervención a gastos efectuados no Instituto Municipal Coruña Espectáculos (IMCE) desde o comezo de mandato.

Deste xeito, e segundo a propia intervención, desde xuño de 2015 os gastos que tiveron algún reparo ascenden até o 1.263.774,05 euros nun total acumulado en 215 gastos diferenciados e asumidos polo IMCE.

Así, poñemos de manifesto que mesmo 86 destes gastos, e dicir, o 40%, tiveron ao tempo dous ou máis reparos da intervención, e que, en case o 95% do total, 204, a causa do reparo parte de gastos que nacen de “necesidades permanentes e continuadas que requiren a formalización dun contrato” segundo a propia intervención.

O certo é que a maior parte dos gastos que teñen reparo de legalidade do interventor responden a gastos recorrentes e habituais para calquera espectáculo cultural e público e requirirían que o IMCE fixese un contrato global de cada un destes servizos para telos cubertos permanentemente e non ir facendo gastos menores de maneira improvisada e con facturas independentes, como se vén facendo nestes últimos anos amosando desleixo na xestión dos cartos de todas e de todos.

​

Neste sentido, profundando no informe, detallamos como máis do 23% dos gastos con reparos de legalidade son provocados porque “o importe acumulado deste supera o límite legal dun contrato menor”, ou tamén como case o 12% se xeraron ”sen unha fiscalización crítica previa”.

Atopámonos incluso con dous gastos, por valor de 20.111,39 € nos que se dá o caso de que xa existía unha empresa contratada para realizar as tarefas para as que son obxecto as facturas.

Deste xeito, a nosa portavoz Avia Veira lembrou que no Pleno deste luns demandamos explicacións, a través dunha pregunta oral, ao concelleiro de Culturas Xosé Manuel Sande, cando na súa intervención adiantaba parte dos datos do informe, mais a contestación do responsábel da área limitouse a sinalar que se estaba a proceder a eliminar os maos hábitos herdados de gobernos municipais anteriores, sen explicar realmente a recorrencia dos reparos.

Mais este argumento queda invalidado xa que logo, e segundo a propia liquidación do IMCE, os gastos con reparos realizados só en 2016, xa con contratos e servizos comprometidos polo Goberno municipal actual, ascenderon ao 15 % sobre os pagos realizados, o que supuxo máis de 785.000 euros.

E é que os abonos con reparos de legalidade emitidos en 2016 foron 123, ascendendo a 785.313,60 €, o que supón o 62,14 % de gastos sobre o total do importe dos gastos con reparo de legalidade desde comezo de mandato até abril deste ano. Para nós isto sinala un proceder impropio dun Goberno que se chamaba a si mesmo a “limpar e varrer”, a “abrir as fiestras e portas de María Pita”, e como o garante a desterrar as prácticas que se realizaban en Cultura e no IMCE durante o mandato do sr. Negreira. Asemella que os malos hábitos non se corrixiron nestes dous anos e fica por ver se finalmente se realiza unha xestión máis eficaz, máis transparente e mellor planificada.

A Coruña, 6 de xuño de 2017

Gráficos explicativos sobre os gastos: