Veira, responsábel de Urbanismo do grupo municipal do BNG, fixo estas declaracións antes os medios nunha comparecencia conxunta con Roberto Rodríguez e María García, viceportavoz e portavoz dos grupos municipais do PP e da Marea Atlántica, respectivamente.

“Desde o BNG só podemos cualificar a aprobación da Axenda Urbana 2030 en Xunta de Goberno Local como unha chafallada”, valorizou Veira. “É unha artimaña para salvar os móbeis e non perder a subvención do Estado para a contratación da consultora que redactou o documento da Axenda Urbana”, completou.

En xogo están 250 mil euros, o que percibiu a consultora para realizar o seu traballo. O Ministerio de Transportes, Mobilidade e Axenda Urbana terá que decidir agora se acepta o procedemento seguido polo Goberno Local –aprobación en Xunta de Goberno Local e non en Pleno. Caso de non o aceptar, o Concello perdería esa subvención de 250 mil euros, “e ese diñeiro teríao que sufragar a veciñanza desta cidade a través da Facenda local”, denunciou a concelleira nacionalista.

E o asunto é que o Goberno Local non pode pretextar que descoñecera os prazos. Non había, pois, tanta premura como para non convocar un Pleno. De feito, o Executivo coruñés barallou esa hipótese nos últimos días, despois de convocar os portavoces a unha reunión o pasado mércores en que se lles fixo entrega do documento, un volume dunhas 1.300 páxinas.

“Non discutimos que os prazos puidesen ser axustados, mais a orde que regula esa subvención para a redacción da Axenda Urbana 2030 é de setembro de 2021 e nela se determinaba con clareza que debía estar aprobada antes do 13 de setembro de 2022”, precisou a concelleira do BNG.

E así hoxe mesmo os Plenos de Santiago de Compostela e Pontevedra si que foron convocados para debater a Axenda Urbana, mentres este documento se aprobaba na Coruña “pola porta de atrás” en Xunta de Goberno Local.

É “un insulto á intelixencia” das forzas políticas da oposición que “se nos diga que non souberon até a semana pasada que tiña que se aprobar antes do 13 de setembro”. Non é só que esa data fose fixada nunha orde de setembro de 2021, é que a propia consultora redactora do documento advertiu diso “no Ágora, cando se comezou cos procesos de preparación, e na última sesión da Mesa da Mobilidade”, coa presenza nesas xuntanzas de integrantes do Goberno Local.

E aínda hai máis: hai un acordo plenario de 3 de decembro de 2021, na parte resolutiva da sesión plenaria, e por tanto xuridicamente vinculante para o Executivo coruñés, “no que acordamos darlle impulso á Axenda Urbana da Coruña 2030 por medio dunha emenda asinada polos tres grupos da oposición”.

Nesa emenda instábase a constituír á maior brevidade posíbel unha Comisión Especial para a Axenda Urbana da Coruña, cuxas funcións ían dirixidas a deseñar un documento que se sometería a debate e aprobación no Pleno. “Falamos dun acordo que é vinculante e que o Goberno Local está obrigado, non só moralmente, senón legalmente, a cumprir e levar a cabo”, subliñou Veira.

O problema é que, unha vez xa aprobado pola Xunta de Goberno Local, o documento xa non admitiría emendas se finalmente for levado ao Pleno. “E isto parécenos grave porque a Axenda Urbana 2030, como seu nome indica, contén obxectivos e proxectos até 2030. Ultrapasa o actual mandato e o seguinte e mesmo a Corporación que resulte electa en 2027”, concluíu a concelleira do BNG.