Orzamentos 2021

O Goberno Local ten que reconsiderar a súa decisión de prorrogar os orzamentos 2020, anunciada polo concelleiro de Facenda en resposta a unha pregunta oral formulada polo portavoz do BNG en María Pita, Francisco Jorquera.

A intención do Goberno Local é prorrogar os orzamentos de 2020. A tese, expresada por José Manuel Lage nunha resposta a unha pregunta oral de Francisco Jorquera, é que nas circunstancias actuais, marcadas pola pandemia, “o orzamento 2021 en ningún caso sería mellor que o orzamento de 2020” prorrogado.

No acordo de investidura asinado por BNG e PSdeG en xuño de 2019 figuraba expresamente que a negociación dos orzamentos do Concello comezaría sempre no mes de setembro, co propósito de que puidesen entrar en vigor a principios de cada ano.