A Coruña, 11 de novembro de 2013.- O Grupo Municipal do BNG denuncia irregularidades na contratación do Servicio de organización, produción e comunicación do evento “Coruña Wapa” que, malia que remata mañá, se atopa “en fase de valoración”, tal e como pode comprobarse no perfil do contratante.

As nacionalistas pregúntanse que leva o Partido Popular a manter oculto o adxudicatario deste contrato de procedemento aberto que ascende a 180.000 euros e anuncian que solicitarán o acceso ao expediente de contratación para coñecer o porqué desta opacidade e a quen benefician eses 180.000 euros.

Por último, o Grupo Municipal do BNG pon de manifesto que os comerciantes denunciaron que as actividades de “Coruña Wapa” non supuxeron ningunha dinamización real da actividade comercial e advirte de que, a pesar do contrato que lles custa ás coruñesas 180.000 euros, o mercado de oportunidades que tivo lugar esta fin de semana no mercado de Santo Agostiño non se publicitou de xeito ningún.