A Coruña, 31 de outubro de 2013.- O BNG vén de levar ao Parlamento de Galiza a publicidade sexista da campaña impulsada polo Goberno do Sr. Negreira “Coruña Wapa”, co fin de que sexa retirada por atentar contra a igualdade entre homes e mulleres. A secretaria xeral de Igualdade da Xunta de Galiza terá que responder no Pleno do Parlamento á pregunta oral que formulará a deputada nacionalista Carme Adán para coñecer que vai facer o Goberno galego respecto da campaña “Coruña Wapa”.

A parlamentar do BNG considera inadmisíbel que unha Administración pública, como é o Concello da Coruña, contribúa deste xeito a transmitir valores sexistas nos distintos soportes publicitarios da cidade, en que se poden ler lemas da talla “Antes muerta que sencilla” ou “La belleza está en el interior del vestidor”.

O BNG rexistrou estas iniciativas despois de que a concelleira Avia Veira presentara unha denuncia sobre a publicidade sexista de “Coruña Wapa” perante o Observatorio da Secretaría Xeral de Igualdade.

As nacionalistas, que critican que o PP fortaleza o patriarcado co fomento da imaxe da muller como obxecto e un ser submiso ao que se lle quita toda a autonomía, esixen a retirada desta campaña machista e indigna.