A Coruña, 30 de xuño de 2013.- A concelleira María Xosé Bravo denuncia o escaso financiamento para obras en centros públicos de Educación Infantil e Primaria do Goberno do Sr. Negreira. Tal e como reflicten os indicadores da memoria de xestión na área de Educación, o gasto por alumno en obras de centros de ensino no 2010, o último ano xestionado completamente polo anterior Goberno, foi de 194,78 euros e o gasto no 2012 recortouse xusto á metade, 87,43 euros.

María Xosé Bravo critica que para o Goberno do Sr. Negreira as obras de mantemento e reparación das escolas sexan unha cuestión menor. Pon como exemplo a nefasta xestión do Goberno municipal co CEIP de Prácticas, de Riazor, que, en setembro de 2012, presentaba graves desperfectos, con grandes fendas que provocaron a preocupación das familias. Porén, a edila do BNG advirte de que “o Goberno do Sr. Negreira só reaccionou no momento en que se sentiu presionado pola comunidade educativa, xa que tiña coñecemento destas grandes eivas ao remate do curso escolar 2011-2012 e non fixo nada até que os medios de comunicación se fixeron eco das queixas das familias”.

A concelleira do BNG lémbralle ao Goberno do Sr. Negreira que o mantemento e reparación dos CEIP son competencia do Concello e esíxelle que garanta a seguridade e benestar do estudantado e dos traballadores e traballadoras que traballan nos centros de ensino.