As chapuzadas do Goberno municipal provocan que non se poidan recuperar as baterías de Oza

As chapuzadas do Goberno municipal provocan que non se poidan recuperar as baterías de Oza

Avia web 1A Coruña, 16 de outubro de 2013.- A concelleira do BNG Avia Veira tivo acceso ao expediente do contrato de obra para a execución do proxecto de recuperación da batería de Oza, onde se revela que a restauración da batería non se puido levar a cabo pola xestión chapuceira do Goberno municipal, que se viu na obriga de dar marcha atrás e cancelar o contrato de obra por non dialogar previamente co Sergas, titular dos terreos en que se asentan as baterías.

Á vista do expediente, Avia Veira pon de manifesto que o Goberno do Sr. Negreira fixo todas e cada unha das xestións administrativas necesarias para un contrato destas característas: proxecto, convite a catro empresas, resolución da adxudicación, comunicación da adxudicación e disposición do gasto de 18.745,93 euros (achégase en documento xunto). A concelleira do BNG explica que chegado o último momento é cando lle fai a consulta ao Sergas e este denégalle a autorización dado que “as actuacións propostas poden xerar problemas funcionais aos usos actuais da zona de traballo”.

Dun proxecto de recuperación das baterías a un proxecto de limpeza de vexetación

A concelleira nacionalista explica que no momento en que o Sergas rexeita a autorización, o Concello elabora a memoria de desestimento, na que propón modificar o criterio de actuación. Así, no lugar do proxecto tombado polo Sergas dada a ineficacia do Goberno do Sr. Negreira temos agora unha “minucia”: colocar uns módulos e instar os propietarios a realizar a limpeza da vexetación do ben (as baterías).

Salienta Avia Veira que o proxecto de recuperación tombado polo Sergas consistía en realizar dúas sondaxes arqueolóxicas (unha en cada batería), a escavación aérea na batería alta (para localizar estruturas hoxe enterradas e que posúen gran valor arqueolóxico), a elaboración dun informe e diagnóstico do estado de conservación con proposta técnica para o tratamento e/ou restauracion e a elaboración de propostas de urbanización e axardinamento para integración das estruturas arquitectónicas.

“En definitiva, a chapuzada do Goberno do Sr. Negreira provoca que de recuperar as baterías de Oza pasemos agora a que, como moito, se poida acometer unha mísera limpeza de herbas e a colocación dunha sinaléctica”, afirma Avia Veira.

As chapuzadas do Goberno municipal provocan que non se poidan recuperar as baterías de Oza