Madrid, 27 de febreiro de 2013.- A deputada do BNG, Rosana Pérez, rexistrou unha proposición non de lei e unha iniciativa parlamentar na Cámara para demandar ao Goberno a rexeneración urxente da Ría de O Burgo.

Rosana Pérez pide ao Goberno central que inicie con carácter urxente unha negociación coa Xunta a fin de acometer canto antes o proxecto de Rexeneración da Ría de O Burgo antes de que a UE volte a sancionar al Estado español polo lamentábel deterioro das augas.

A deputada do BNG lembra que o BNG leva anos trasladando ao Congreso e ao Parlamento galego, así como á corporación municipal de A Coruña, numerosas iniciativas demandando a limpeza da Ría, “nunha situación de grande deterioro medioambiental e preocupa desde o punto de vista socio-económico porque afecta ao colectivo de mariscadores e mariscadoras da zona”.

Salientou a recente visita da europarlamentares que serviu para dar a voz de alarma sobre o deplorábel estado da Ría.

A parlamentar nacionalista subliña que a iniciativa do BNG, logrouse que o anterior Goberno incluíse unha partida nos Orzamentos do Estado destinada á rexeneración da Ría de O Burgo, “pero tanto a Xunta como o Goberno central se adicaron a pasarse a pelota, enredados na maraña das respoonsabilidades mutuas e sen resolver o problema destas augas”.

Rosana Pérez pón de manifesto que actualmente na Ría de O Burgo “só se manteñen 76 mariscadoras a pé e 38 embarcacións de marisqueo a flote para a extracción de ameixa fina, babosa e xapónica, e berberecho”.

Unha Ría, puntualiza, na que hai trinta anos mariscaban 2.200 persoas. “Hai tres décadas, o 85% dos espazos da Ría eran produtivos cando agora a porcentaxe chega só a un 20%. De continuar este nivel de deterioro, chegaráse á total morte reproductiva”.

Ademáis, sinala non hai que esquecer que a “desidia de ambas administracións está a levar aos traballadores do mar a un calexón sen saída porque a curto prazo nos podemos enfrontar á desaparición do banco marisqueiro”.

Sobre o estado español pode pesar a terceira sanción da UE por non ter saneado a Ría de O Burgo.