En concreto, a Xunta de Goberno Local acordou a cesión de 4 parcelas ao Instituto Galego de Vivenda e Solo para que se constrúa vivenda de protección autonómica.

Mais o problema, repara Avia Veira, é que o Goberno Local non recolle en ningunha parte que esas vivendas teñan de ser en réxime de aluguer.

“Nós, desde o BNG, pensamos que é imprescindíbel que as vivendas se oferten en aluguer porque a Xunta de Galiza do PP nos últimos dous anos subiu o prezo de compra das vivendas de protección autonómica nun 40%, o que deixa fóra moitas familias, e precisamente as familias con máis necesidades”, afirma.

Nesa mesma sesión, a Xunta de Goberno Local tamén acordou sacar a concurso varias parcelas municipais en Xuxán para construción de moradas e a súa explotación en réxime de aluguer, unha delas para vivendas de protección autonómica e outras dúas para aluguer con renda limitada.

Esa renda limitada vén marcada “a través dun sistema estatal, determinado polos prezos que establece o propio mercado”. “A fórmula debería ser distinta. Debería ser o Concello quen establecese os prezos dese aluguer”, alega.

Nas súas preguntas, Veira quere saber por que nos pregos “non se recolle como se vai acceder a estas vivendas” nin “que persoas van poder solicitalas” nin “tampouco como vai ser o propio concurso”.

Canto ao proxecto construtivo, o BNG pensa que o Goberno Local tería de ter sido máis esixente, “e recoller por exemplo que dentro dos edificios haxa espazo para as bibliotecas ou prever que nos seus baixos haxa comercio local, imprescindíbel nun barrio de nova creación como Xuxán”.