A Coruña, 19 de setembro de 2013.- O Grupo municipal do BNG alégrase de que por fin o concelleiro de Urbanismo vaia por Palavea, aínda que sexa tarde, logo de lle ter exixido a veciñanza e as nacionalistas, a través de diversas iniciativas, algunhas das cales aínda non foron contestadas, accións inmediatas e eficaces para a resolución de diversos problemas.

Mais o Grupo municipal do BNG lamenta que só aproveitase a visita para se facer unha foto a carón do transformador, sen se preocupar de falar coa veciñanza e de resolver as outras necesidades que está a padecer o barrio e que así lle demandan as persoas que nel habitan. Segundo lle comunicaron as veciñas e veciños do lugar ao BNG, o sr. Fernández Prado nada máis facerse a foto ao pé do transformador, foise directo ao bar do centro cívico, sen reparar para nada nas necesidades existentes no barrio. A veciñanza de Palavea púxose en contacto co BNG para amosar o seu malestar porque o concelleiro non tiña tempo para falar con eles mais si para tomar un café (achéganse fotos enviadas polos propios veciños). Deste modo, a veciñanza vai saber do proxecto de urbanización de Palavea só pola prensa, sen que se tivese en conta previamente a súa opinión ao respeto.

O barrio de Palavea padece un estado de deterioro, abandono e incomunicación con rúas sen asfaltar, casas abandonadas…, coa presenza, incluso, de ratas de grande tamaño polas rúas, razóns pola que as nacionalistas se presentaron no barrio en varias ocasións nestes últimos meses e formularon unha serie de iniciativas que aínda non foron contestadas (anexo 1). Neste contexto de esquecemento do barrio, produciuse nun dos transformadores eléctricos situados no lugar a aparición de fendas ademais de caer parte da cornixa, o cal tamén foi obxecto de iniciativa polo BNG (anexo 2).

O Grupo do BNG espera que o Goberno local, ademais de explicarlle á veciñanza o que ten pensado facer, adopte accións inmediatas e eficaces para a resolución dos problemas do barrio a causa do abandono que vive e sempre de acordo coa veciñanza.

Concretamente, entre as peticións das veciñas, seguen figurando:

-pavimentación de Palavea vella

-mellora dos accesos ao barrio

-construción de pasarela que conecte Palavea con Santa Xema

-colocación máis papeleiras no barrio

-necesidade de educadoras/es de rúa para traballar coa mocidade

-recuperación da oficina de correos no barrio

-dotación no centro cívico dun rexistro auxiliar

-estabelecemento de barreiras sonoras que arreden aos predios e ás casas das vías que arrodean o barrio

-reforzamento das liñas intermetropolitanas de buses

-recuperar a casa do Curro para usos veciñais

-saneamento do río Quintás

-recuperación e mantemento do patrimonio do lugar: a fonte, o pombal e o lavadoiro

-recuperación dos camiños e potenciación das sendas

-ordenar o tráfico en Palavea Vella