Após a sinatura do protocolo para abrir ao acceso público o parque e a zona verde do Observatorio meteorolóxico entre o Concello da Coruña e a AEMET en 2023, a Agra do Orzán continúa sen se ver dotada dunha zona verde de esparexemento. A parálise que lastra este proxecto xa vai perto de facer dous anos e, ante esta situación, a formación nacionalista demanda materializar o antes posíbel a actuación, de modo a abrir ao público este espazo.

A idea inicial, lembra o deputado do BNG no Congreso, consistía en acondicionar o parque e derrubar o muro que o rodea para o abrir ás rúas lindeiras de Canceliña, Páramo e Gregorio Hernández. “Nun barrio carente de áreas verdes e  de esparexemento, esta era unha actuación fundamental e unha demanda histórica da veciñanza da Agra do Orzán”, resalta Néstor Rego. Unha área densamente poboada e urbanizada que “precisa de áreas verdes que cada vez son máis escasas debido a unha crecente urbanización”.

“Non se entende esta demora posto que tras a automatización do Observatorio meteorolóxico da Coruña, hai xa uns anos, a AEMET non precisa utilizar os terreos nin as instalacións. Só se mantén un pequeno espazo de acceso restrinxido e protexido, o resto está sen actividade algunha”, indica.

Para máis inri, cumpre lembrar que o parque da Agra estaba aberto ao público antes da pandemia mais. Desde entón, a veciñanza viuse privada dunha área verde e confiaba en que despois de asinarse o protocolo de colaboración, se procedería con rapidez á súa apertura e acondicionamento nos termos do proxecto. “Resulta incomprensíbel a situación de parálise para materializar unha actuación que non reviste de ningunha dificultade” afirma Rego.

Ante o actual estado das cousas, o BNG exíxelle explicacións ao Goberno do Estado para coñecer a que se debe o importante retraso no cumprimento do protocolo asinado e demanda a máxima celeridade para o desenvolver e, consecuentemente, para abrir ao acceso público este parque e zona verde.