De forma incomprensíbel o proxecto de reforma dos Cantóns aprobado polo Goberno de Inés Rey elimina a zona de carga e descarga dos teatros Colón e Rosalía, unha área de servizo imprescindíbel para estes equipamentos culturais tan importantes na nosa cidade.

Así o denuncia a concelleira do BNG Mercedes Queixas, quen acaba de rexistrar un feixe de preguntas por escrito ao respecto e por medio das cales insta o Goberno Local a que rectifique o proxecto e restitúa a zona de carga e descarga da rúa Manuel Casás, sen a cal os teatros da cidade non poderían funcionar con normalidade.

“Resulta inexplicábel que o Goberno Local non observase este problema na fase de elaboración do proxecto, como tamén é inexplicábel que no teña dado pasos para emendar este evidente erro nun momento en que as obras xa están en marcha”, remarca Queixas.

A concelleira nacionalista urxe o Goberno Local a que “rectifique canto antes e faga as xestións necesarias para modificar este proxecto, de modo a garantir un servizo público fundamental como é o acceso a estes dous espazos que son absolutamente centrais para a cultura na nosa cidade”.