Existe un grande número de contratos da área de Deportes do Concello ou caducados ou a piques de caducar, o que leva o noso concelleiro David Soto a formular un feixe de preguntas por escrito ao Goberno Local.

O Campo Municipal de Golf, o Complexo Deportivo de San Diego, a Piscina Municipal de San Amaro, o Polideportivo Municipal da Sagrada Familia son exemplos desta situación.

David Soto inquire o Goberno Local sobre a falta de mantemento e a redución das clases dirixidas no Polideportivo de San Diego

“Cando caducou ou vai caducar o contrato de concesión das conserxarías das instalacións deportivas municipais?”, cuestiona o concelleiro nacionalista, quen se interesa igualmente por saber “cal é a xuízo do Goberno Municipal a razón de existiren tantos contratos de concesión caducados”.

Sobre o Polideportivo de San Diego, Soto quere saber se o Goberno de Inés Rey é coñecedor dos problemas orixinados polo seu deficiente mantemento e se lle consta que se ten producido unha redución na oferta de clases dirixidas.

“Cando vai saír a concurso a licitación da nova concesión da xestión do polideportivo?”, inquire o noso concelleiro.