“Estamos seguros que o Consello Económico e Social será non só un foro privilexiado para analizar as necesidades e as oportunidades da cidade, senón tamén un viveiro de propostas que sirvan ao interese común”, afirmou na súa intervención perante o Pleno o concelleiro do BNG David Soto.

Soto agarda que se teña en conta a suxestión da Secretaría Xeral do Pleno para que o ámbito de actuación do CES se estenda tamén á contorna metropolitana da cidade, “dada a estreitísima imbricación da economía da cidade” coa comarca coruñesa.

Ao mesmo tempo, demandou que se faga un esforzo para integrar neste novo organismo a representantes das pequenas e medianas empresas e as e os traballadores autónomos, “pola importancia da súa contribución á economía da cidade”.

E para pór o ramo á súa intervención, salientou que a proposta de creación do CES “naceu do diálogo do BNG coas centrais sindicais da Coruña, ás que agradecemos de corazón o seu compromiso co ben común desta cidade”.