O antídoto para frear o retorno das ideas reaccionarias é o compromiso cos ideais de emancipación social e nacional que durante a II República encarnou o Partido Galeguista de Bóveda e Castelao e que agora representa o nacionalismo do BNG.

“Temos que ter moi presentes sempre as leccións de Castelao -do cal este 2025 celebramos o 75 aniversario do seu pasamento-, Bóveda e o mozo Pedro Galán Calvete”, afirmou durante a súa intervención, no cemiterio de Santo Amaro, o historiador Manuel Rei.

O acto -organizado polo grupo de barrio de Monte Alto e por Galiza Nova da Coruña- realizouse diante da tumba do mozo galeguista e con el rendeuse tributo a un mozo que, alén do seu compromiso político, foi un grande activista social, a participar, por exemplo, na fundación do Club de Mar de Santo Amaro.

“A Coruña e o barrio de Monte Alto senten orgullo por ter tido como veciño Pedro Galán Calvete. Nin A Coruña nin Monte Alto esquecen nin esquecerán nunca o seu asasinato”, dixo durante o acto o responsábel comarcal de Galiza Nova, Anxo Vázquez.

A música correu a cargo do grupo de gaitas da Asociación Veciñal de Atochas Monte Alto -que interpretou a marcha do antigo Reino de Galiza e o himno nacional galego- e o acto incluíu unha ofrenda floral por parte da familia de Galán Calvete.