Vimos de presentar esta mañá unha batería de iniciativas (podes descargalas premendo aquí) no Parlamento de Galiza para impedir a construción dunha Planta de tratamento de aceites e hidrocarburos na bocana da Ría do Burgo.

Deste xeito, damos traslado a sede parlamentaria da oposición veciñal xa amosada, tanto por entidades e asociación veciñais, así como particulares e incluso administracións, para coa construción desta planta da que se espera unha capacidade máxima de xestión de refugallos de 4.000 toneladas ao año, cunha capacidade máxima de tratamento de 26.280 m³/ano e dos que se van extraer mil toneladas ao ano de augas residuais nunhas instalacións situadas no peirao de Oza.

A instalación prevese nunha localización a menos de 500 metros de bancos de produción marisqueira, ao carón de sendas praias (Oza, Santa Cristina e Bastiagueiro), ao carón dun complexo náutico deportivo e dentro do conxunto urbano do barrio de Oza, asiduamente atacado por ser a zona dos peiraos da Coruña onde se teñen desenvolto actividades altamente contaminantes, causantes dunha contrastada polución medioambiental, como descargas de carbón e outros materiais, e por existir desaugues ou canalizacións que teñen producido filtracións e verteduras de hidrocarburos.

A autorización da Xunta de Galiza para a instalación desta planta de almacenaxe e pretratamento de aceites industriais e hidrocarburos no Peirao de Oza da Coruña asemella outra das actuación sen sentido ás que nos ten afeita a Consellaría de Medio Ambiente e Ordenación Territorial, amosando, asemade, o seu total desprezo para co medio ambiente nunha contorna constantemente agredida como da Ría do Burgo.

Así, rexistramos esta maña atópanse sendas proposicións non de lei para o seu debate en Pleno e en comisión na que solicitan do Parlamento galego o instar á Xunta de Galiza a desestimar e rexeitar a construción dunha Planta de recepción e pretratamento de residuos xerados por buques, no Concello da Coruña, promovido por Limpeza Marítima de Óleos, S.L.U. Limpoil (clave do proxecto 2015/0167), ademais de trasladar varias preguntas e unha interpelación nas que esiximos da Xunta a xustificación da construción desta Planta e o por que só se ten realizado un Estudo de Impacto Ambiental Simplificado para un proxecto destas características.

Pese ao informe técnico do Departamento de Xestión Enerxética e Residuos Urbanos do Concello da Coruña, recollendo as indicacións da Ordenanza Municipal de Vertidos e do Servizo Municipal de Saneamento, no que  indicaba que este proxecto «pode causar impactos ambientais significativos e que se trata dunha zona de sensibilidade especial», e recomendaba establecer medidas adicionais a considerar antes da aprobación do proxecto que «debería ser obxecto dunha avaliación ambiental ordinaria, e non simplificada», finalmente a Consellaría de Beatriz Mato decidiu seguir para adiante co proxecto, o que evidencia o que lle importa a cidade á futura candidata do Partido Popular.

A Coruña, 27 de novembro de 2017.