A comezos de abril, Repsol anunciou a súa intención de declarar un ERTE na súa refinaría da Coruña. Alegaba causas produtivas, a atinxir un total de 212 empregados -31% do persoal- en distinto grao. No comunicado feito público, a compañía xustifica a necesidade de acudir ao expediente no descenso da mobilidade causada polas medidas adoptadas fronte á pandemia da COVID-19.

“O centro de traballo mantivo a integridade do seu cadro de persoal nos momentos máis duros da pandemia, polo que non se pode entender que, agora, a un mes escaso de que se poña fin ao Estado de alarma, a empresa faga un ERTE de seis meses de duración”, apunta Néstor Rego. A representación sindical rexeita a medida por considerar que vai ligada ás rebaixas salariais que se propoñen desde a dirección na negociación no Acordo Marco.

En opinión do deputado nacionalista, o Goberno estatal “ten que ser coñecedor da problemática que se está a producir na refinaría da Coruña” e intervir se non “existiren razóns suficientes e fundadas para que esta empresa se acolla a un ERTE no momento actual, sabendo que a compañía tivo un beneficio neto axustado en 2020 de 320 millóns de euros e un beneficio operativo, sen partidas extraordinarias, de 1.009 millóns de euros”.

“Resulta preocupante esta decisión da compañía polo momento en que chega, pois para garantir a supervivencia da planta e dos empregos tanto directos como das empresas auxiliares, é imprescindíbel acometer novos investimentos e melloras para adaptarse ao novo marco normativo fronte ao cambio climático” asegura Néstor Rego. Medidas de adaptación que xa foron anunciadas noutros complexos industriais de REPSOL, pero dos que non se fixo aínda público como se concretarán na refinaría da Coruña.