Dúas ideas ficaron ben claras durante o acto: que o BNG vai ser durante este mandato, como adoita ser en calquera institución representativa, terminal política en María Pita de todo aquilo que se move pola base da sociedade e que o Bloque emerxe, despois do 28X, como forza determinante e decisiva no Concello.

No acto estiveron presentes e tomaron a palabra representantes de entidades como as asociacións veciñais do Birloque e Monte Martelo, a Liga Reumatolóxica Galega, a Federación Galega de Enfermidades Raras, os comités de empresa de Nostián e das conserxarías das instalacións deportivas municipais, a asociación cultural O Facho, o Proxecto Escoita, a comunidade de veciños das Vivendas de Franco, Defensa do Común, a USO da concesionaria de limpeza viaria, as e os veciños da Agra dos Mallos.

Escoitáronse avaliacións do proceso de negociación habido co PSOE por volta do Acordo de Investidura, mais sobre todo as persoas que pediron a palabra fixérono para lle trasladar ao BNG as súas visións sobre tarefas pendentes a impulsar desde o Concello.

"Centramos moito este acto en trasladarvos a nosa valoración do que deu de si a negociación co PSOE porque é o que agora toca, a nova Corporación está aínda comezando a funcionar, mais a nosa vontade é que estes acordos sexan periódicos, que nos permitan ter unha interacción permanente convosco, para recollermos as vosas suxestións e propostas, visando que o BNG sexa unha ferramenta útil para os vosos anceios, as vosas demandas, teren reflexo na política municipal", afirmou, na intervención que puxo ramo ao acto, o noso portavoz no Concello, Francisco Jorquera.